کراچی: پی ایس ایل کے میچ میں ملتان سلطانزنے پشاور زلمی کو شکست دے کر فائنل کے لیے کوالیفائی کرلیا۔
پاکستان سپر لیگ کے نویں ایڈیشن کا کوالیفائر میچ نیشنل اسٹیڈیم کراچی میں ہوا، جس میں ملتان سلطانز نے پشاور زلمی کو شکست دے دی۔ میچ کے نتیجے میں ملتان سلطانز فائنل میں پہنچ گئی۔
پشاور زلمی کے کپتان بابراعظم نے ٹاس جیت کر پہلے بیٹنگ کا فیصلہ کیا تھا او ر اپنی اننگز میں 146 رنز بنا کر ملتان سلطانز کو 147 رنز کا ہدف دیا تھا، جس کے تعاقب میںملتان سلطانز کی ٹیم نے 19 ویں اوور میں ہدف حاصل کرکے میچ میں کامیابی حاصل کرلی۔
ملتان سلطانز کی اننگز کا آغاز یاسر خان اور محمد رضوان نے کیا تاہم 8 ویں اوور میں 61 کے مجموعی اسکور پر محمد رضوان 15 رنز بناکر پویلین لوٹے جبکہ دوسری وکٹ 84 رنز کے مجموعی اسکور پر یاسر خان کی گری جنہوں نے 37 گیندوں پر 54 رنز اسکور کیے۔
اس پہلے پشاور زلمی نے بیٹنگ کرتے ہوئے 20 اوورز میں 7 وکٹوں کے نقصان پر 146 رنز بنائے تھے۔ اننگز کا آغاز صائم ایوب اور بابراعظم نے کیا تاہم صائم ایوب صرف ایک ہی رن بنا سکے اور میدان سے باہر چکے گئے۔ بعد ازاں 51 کے مجموعی اسکور پر محمد حارث 22 رنز پر آؤٹ ہو گئے، اس کے بعد حسیب اللہ بھی صرف 3 رنز بنانے کے بعد 57 کے مجموعی اسکور پر پویلین پہنچے۔
چودھویں اوور میں بابراعظم 46 رنز بناکر آؤٹ ہو گئے۔ ٹام کوہلر 24 اور روومین پاول 12 رنز بناکر آؤٹ ہوئے۔ پال والٹر اور لیوک ووڈ 14، 14 رنز بناکر ناٹ آؤٹ رہے۔
