اہل کراچی زحمت سے بچ گئے، بارش کا سسٹم نکل گیا، آج مطلع صاف رہے گا

کراچی: شہر قائد کے باسی بارش کے دوران حکومتی نااہلی کے سبب پیش آنے والی بڑی زحمت سے بچ گئے۔ کراچی میں بارش برسانے والا سسٹم چلا گیا جس کی وجہ سے آج ہفتے کے روز مطلع صاف رہنے کی پیش گوئی ہے۔

محکمہ موسمیات کے مطابق کراچی میں درمیانی اورتیزبارش کا سبب بننے والا مغربی سسٹم کا کافی بڑا حصہ شہر کی حدود سے نکل گیا ہے۔ چیف میٹرولوجسٹ کراچی سردار فراز کا کہنا ہے کہ بارش کا سسٹم بتدریج مشرقی جانب منتقل ہورہا ہے، اور آج رات گئے تک شہر کے مختلف علاقوں میں ہلکی بارش اورپھوارہوسکتی ہے۔

انہوں نے کہا کہ ہفتے کوکراچی میں مطلع صاف رہے گا جبکہ بارش کا امکان نہیں ہے، بارش کے عقب میں موجود سرد ہواؤں کے اثرات آج رات سے شہرپرنمودارہوسکتے ہیں۔

سردار فراز کا کہنا تھا کہ سرد ہواؤں کے اثرات کی وجہ سے درجہ حرارت میں 2سے 3ڈگری کمی اورخنکی میں اضافہ متوقع ہے۔