لاہور: انسداد دہشتگردی عدالت نے بانی تحریک انصاف عمران خان کی ظل شاہ قتل کیس، زمان پارک جلاؤ گھیراؤ سمیت چار مقدمات میں عبوری ضمانت منظور کرلی۔
انسدادِ دہشت گردی عدالت لاہور کے جج ارشد جاوید نے بانی پی ٹی آئی کی درخواست ضمانت پر فیصلہ سنایا، عدالت نے پانچ پانچ لاکھ روپے مچلکوں کے عوض ضمانتیں منظور کی ہیں۔
یاد رہے کہ زمان پارک جلا وگھیراؤ سمیت چار مقدمات میں ضمانت کے لیے سابق وزیر اعظم نے عدالت سے رجوع کیا تھا۔ بانی پی ٹی آئی کے خلاف دو مقدمات تھانہ ریس کورس، ایک نصیر آباد اور ایک مقدمہ ماڈل ٹان پولیس اسٹیشن میں درج ہے۔
گزشتہ سال مارچ میں ظل شاہ قتل کیس میں حقائق چھپانے کے الزام میں عمران خان پر مقدمہ درج کیا گیا تھا۔8 مارچ 2023 کو لاہور میں پی ٹی آئی کی ریلی کے دوران دفعہ 144 کی خلاف ورزی پر پولیس نے کریک ڈاون کیا تھا جبکہ اس دوران پی ٹی آئی کا کارکن علی بلال جاں بحق ہوگیا تھا۔۔۔
