لاہور: پی ایس ایل کے سیزن 9 کے اہم میچ میں کراچی کنگز کے ہاتھوں لاہور قلندرز کو شکست کا سامنا کرنا پڑ گیا۔
قذافی اسٹیڈیم میں ہونے والے ایونٹ کے دسویں میچ میں کراچی کنگز نے ٹاس جیت کر لاہور قلندرز کو پہلے کھیلنے کی دعوت دی تھی اور خود فیلڈنگ کرنے کا فیصلہ کیا تھا، جس میں دلچسپ مقابلے کے بعد کراچی کنگز نے لاہور قلندرز کو 2 وکٹوں سے ہرا دیا۔
لاہور قلندرز نے پہلے میچ کھیلتے ہوئے مقررہ 20 اوورز میں 6 وکٹ پر 175 رنز بنائے، جس کے جواب میں کراچی کنگز نے 176 رنز کا ہدف 8 وکٹوں کے نقصان پر دلچسپ قابلے میں آخری گیند پر پورا کیا۔
لاہور کے اوپنر صاحبزادہ فرحان نے 45 گیندوں پر 72 رنز کی شان دار ناقابل شکست اننگز کھیلی۔ ان کی اننگز میں 4 چھکے اور 4 چوکے شامل تھے۔ان کے علاوہ جارج لینڈا 26 رنز کے ساتھ ناقابل شکست رہے، ریسی وین ڈر ڈاوسن نے بھی 26 رنز بنائے۔ شائی ہوپ نے 21 اور جہانداد خان نے 12 رنزبنائے۔
کراچی کنگز کی جانب سے میرحمزہ، حسن علی اور تبریز شمسی نے 2 ،2 وکٹیں حاصل کیں۔
