لاہور:پاکستان مسلم لیگ نواز (پی ایم ایل این) کی چیف آرگنائزر مریم نواز نے کہا ہے کہ سابق وزیراعظم نواز شریف حکومتی عہدہ نہ لینے کے باوجود سیاست میں بڑھ چڑھ کر حصہ لیں گے۔
انہوں نے ایکس پر ایک پوسٹ میں کہا کہ اگر یہ اندازہ لگایا جا رہا ہے کہ نواز شریف وزارت عظمیٰ کا عہدہ قبول نہ کر کے سیاست چھوڑ رہے ہیں تو اس میں کوئی صداقت نہیں ہے۔
مریم نواز کے مطابق مسلم لیگ ن کے لیڈر بھرپور طریقے سے سیاست میں حصہ لیں گے مرکز اور پنجاب میں حکومتوں کی سرپرستی کریں گے ۔
انہوں نے کہا کہ نواز شریف کی تین حکومتوں میں عوام نے انہیں واضح اکثریت دی اور وہ اپنی انتخابی تقاریر میں واضح کر چکے ہیں کہ وہ کسی مخلوط حکومت کا حصہ نہیں بنیں گے۔
وزارت عظمیٰ کا عہدہ قبول نا کرنے کا مطلب اگر یہ اخذ کیا جا رہا ہے کہ نواز شریف سیاست سے کنارہ کش ہو رہے ہیں تو اس میں کوئی سچائی نہیں۔ اگلے ۵ سال وہ نا صرف بھرپور سیاست کریں گے بلکہ وفاق و پنجاب میں اپنی حکومتوں کی سرپرستی کریں گے انشاءاللّہ۔
نوازشریف کی تینوں حکومتوں میں عوام…— Maryam Nawaz Sharif (@MaryamNSharif) February 14, 2024
انہوں نے مزید کہا کہ شہباز شریف اپنے بڑے بھائی کے حکم کے پابند ہوں گے اور ان کی قیادت اور نگرانی میں کام کریں گے۔
ایک روز قبل نواز شریف نے اپنے چھوٹے بھائی شہباز شریف کو وزارت عظمیٰ کے لیے نامزد کیا تھا کیونکہ پی ایم ایل این کے حامیوں نے سوشل میڈیا پر افسوس اور شرمندگی سے لے کر سراسر مایوسی تک کے شدید جذبات کا اظہار کیا تھا۔
نواز شریف کی جانب سے شہباز شریف کو اعلیٰ عہدے کے لیے نامزد کرنے کا فیصلہ پارٹی کی ترجمان مریم اورنگزیب نے ایکس جو ٹوئٹر ہے پر ایک پوسٹ میں قوم کو بتایا۔
