لاہور کے ریس کورس گراؤنڈ میں پی ایس ایل کے نویں ایڈیشن کی ٹرافی کی رونمائی کی تقریب کا اہتمام کیا گیا جس میں چیئرمین پی سی بی محسن نقوی، فرنچائز مالکان، ایچ بی ایل کے نمائندوں اور اسٹار کرکٹرز بھی موجود تھے۔
تقریب میں ملتان سلطانز کے کپتان محمد رضوان ،کوئٹہ گلیڈی ایٹرز کے کپتان سرفراز، کراچی کنگز کے کپتان شان مسعود اور پشاور زلمی کے کپتان بابر اعظم بھی شریک تھے۔
اس موقع پر چیئرمین پی سی بی محسن نقوی نے گفتگو کرتے ہوئے کہا کہ یہ اعلان کرتے ہوئے خوشی ہو رہی ہے کہ ایچ بی ایل پی ایس ایل اپنے نویں سیزن میں داخل ہو رہا ہے۔ آج پی ایس ایل ٹرافی کی رونمائی کی گئی ہے، امید ہے یہ ٹونامنٹ اچھا رہے گا، ہماری طرف سے تمام تیاریاں مکمل ہیں
اس موقع پر پشاور زلمی کے کپتان بابر اعظم نے کہا کہ پشاور زلمی متوازن ٹیم ہے، بولنگ کو بہتر کیا ہے، صائم ایوب سے بہت امیدیں ہیں، کمبی نیشن اچھا بنا ہوا ہے، تمام ٹیمیں اچھی لگ رہی ہیں، محمد حارث اس مرتبہ پہلے سے بہتر نظر آئے گا۔
سرفراز احمد نے کہا کہ متوازن ٹیم ہے، فاسٹ بولنگ مضبوط ہے، کوشش کریں گے اچھا کمبی نیشن بنائیں۔
شاداب خان نے کہا کہ چیمپئن پلیئرز لائے ہیں، اس مرتبہ اچھی پرفارمنس ہوگی، شاہ برادرز کو سب دیکھیں گے، عبید شاہ دیکھنے کے لائق ہوگا۔
اس موقع پر شاہین آفریدی نے کہا کہ ان حالات میں اگر کرکٹ ہوتی ہے تو یہ اچھا ہوگا، نوجوان کھلاڑی آئے ہیں اس مرتبہ بھی اچھا کھیلیں گے، میں تازہ دم اور فٹ ہوں اور مکمل تیار ہوں۔ پی ڈی پی کے پلیئرز دیکھنے کے لائق ہوں گے، ٹیم متوازن ہے بدقسمتی سے راشد خان نہیں آرہے، دیگر کھلاڑی بھی اچھے ہیں ان کی کمی محسوس نہیں ہوگی۔
