کراچی:بلوچستان کی معمول سےقدرے تیزسرد ہوائیں شہر پر اثرانداز ہونا شروع ہوگئیں، جس کے نتیجے میں کل جمعہ کے روز درجہ حرارت 15ڈگری رہنے کا امکان ہے۔
جمعرات کے روز شہر میں 2مختلف موسم ریکارڈ ہوئے۔صبح اور رات کے اوقات میں خنکی رہی جب کہ دن میں تیزدھوپ کی وجہ سے معمولی حدت محسوس کی گئی۔
محکمہ موسمیات کے مطابق جمعرات کو کم سے کم پارہ 17ڈگری جب کہ زیادہ سے زیادہ 26.5ڈگری سینٹی گریڈ ریکارڈ ہوا۔ صبح کے وقت بلوچستان کی شمال مشرقی سمت سے چلنے والی ہواؤں کی رفتار18کلومیٹرفی گھنٹہ ریکارڈ ہوئی۔
ارلی وارننگ سینٹر کے مطابق آج کم سے کم پارہ 15ڈگری جب کہ ہفتے کو مزید ایک ڈگری کمی سے 14ڈگری سینٹی گریڈ ریکارڈ ہوسکتا ہے۔ آئندہ 3 روز کے دوران موسم خشک جب کہ رات میں سرد رہنے کا امکان ہے۔
