لاہور: تحریک انصاف کی امیدوار صنم جاوید نے کہا ہے کہ مریم نواز کو بتا دو میں میدان میں آ گئی ہوں،میری انتخابی مہم میری فیملی چلائے گی، مریم نواز کا مقابلہ میرے لئے عوام کرے گی۔
تفصیلات کے مطابق تحریک انصاف کی امیدوار صنم جاوید کی ن لیگ آفس جلانے کے کیس میں بعد از گرفتاری ضمانت کی درخواست پر فیصلہ محفوظ، 29 جنوری کو سنایا جائے گا۔
انسداد دہشت گردی عدالت کے جج ارشد جاوید چدھڑ نے کیس کی سماعت کی اورکارروائی مکمل کرتے ہوئے پی ٹی آئی امیدوار کی ضمانت پر فیصلہ سنانے کے لیے آئندہ سماعت 29 جنوری تک ملتوی کر دی۔
ذرائع کے مطابق صنم جاوید کے وکیل شکیل پاشا ایڈووکیٹ نے عدالت میں موقف پیش کرتے ہوئے کہا کہ صنم جاوید کو چھ ماہ بعد اس مقدمہ میں ملوث کیا گیا۔
ڈپٹی پراسیکیوٹر عبد الجبار ڈوگر نے اس موقع پر ضمانت مسترد کرنے کی استدعا کی اور کہا کہ نو مئی کو ریاست پر منظم حملہ ہوا ملک بھر میں نو مئی کی 1300 ایف آئی آرز درج ہیں۔
رپورٹس کے مطابق ملزمہ صنم جاوید نے عوام کو جلا گھیرا پر اکسایا، مقدمہ کا چالان بھی جمع ہو چکا ہے کیس کا کچھ دن میں فیصلہ ہو جائے گا۔
تحریک انصاف کی امیدوار صنم جاوید نے انسداد دہشتگردی عدالت میں میڈیا سے غیر رسمی گفتگو کرتے ہوئے کہا کہ مریم نواز کو بتا دو میں میدان میں آگئی ہوں، میری انتخابی مہم میری فیملی چلائے گی، مریم نواز کا مقابلہ میرے لئے عوام کرے گی۔
