اسلام آباد: بانی چیئرمین پی ٹی آئی عمران خان نے کہا ہے کہ میرا ٹرائل روزانہ کی بنیاد پر ہو رہا ہے جب کہ نواز شریف کو ریلیف مل رہا ہے۔
اڈیالہ جیل میں سائفر کیس کی سماعت کے موقع پر میڈیا کے نمائندوں سے بات کرتے ہوئے سابق وزیراعظم اور بانی چیئرمین پی ٹی آئی کا کہنا تھا کہ سائفر کیس کے معاملے میں جج، جیوری اور پراسیکیوشن سب ایک ہیں۔ یہ میچ فکس ہے۔
عمران خان نے کہا کہ بدترین کریک ڈاؤن کے باعث عوام کا آزادی سے رہنے کا بنیادی حق متاثر ہو رہا ہے، ملک میں بنیادی انسانی حقوق کی دھجیاں اڑائی جارہی ہیں، میرے وکلا الیکشن لڑ رہے ہیں اس لیے آج عدالت میں پیش نہیں ہوسکے ہم کیس پوری طرح سے لڑیں گے پیر سے لیگل ٹیم جائے گی۔
انہوں نے کہا کہ نجم سیٹھی نے کہا 5 فروری سے قبل فیصلہ ہوجائے گا اور مجھے سزا ہو جائے گی، نجم سیٹھی کو یہ انفارمیشن کہاں سے ملی؟ نجم سیٹھی جہاں سے انفارمیشن لیتا ہے سب کو پتا ہے، عدالت نجم سیٹھی کو طلب کرے اور اس حوالے سے پوچھے۔ میرا روزانہ کی بنیاد پر ٹرائل چل رہا ہے اور نواز شریف کو ریلیف مل رہا ہے، لیول پلیئنگ فیلڈ کے حوالے سے سب جھوٹ بول رہے ہیں، نواز شریف کی ایک ہی اُمید ہے کہ اسے ویگو ڈالہ الیکشن جتوائے اور عوام نواز شریف کو نہیں جیتنے دے گی۔
عمران خان کا کہنا تھا کہ ویگو ڈالے کا کمال ہے کہ اس نے سافٹ ویئر اَپ ڈیٹ کر کے خیبر پختونخوا میں 2 پارٹیاں بنا دیں۔صحافی نے سوال کیا کہ آپ تمام معاملات کے حل کے لیے صدر پاکستان سے بات کیوں نہیں کرتے؟ اس پر عمران خان نے کہا کہ صدر پاکستان کی سنتا کون ہے؟
