نارووال:مسلم لیگ ن کے رہنما احسن اقبال نے کہاہے کہ بلاول زرداری کو دعوت ہے کہ آپ ہمارے قائد اور جماعت پر تنقید کرنے سے پہلے اپنی کارکردگی کا جائزہ لیں، آپ اپنے لاڑکانہ کا مقابلہ نارووال سے کر لیں۔
احسن اقبال نے کہاکہ بلاول کے پاس پچھلے 15 سال سے سندھ کی حکومت ہے، کراچی کو کھنڈرات کا شہر بنا دیا گیا ہے، وہ کراچی کبھی روشنیوں کا شہر ہوتا تھا، بلاول کو اسطرح کے بے بنیاد اور غیر اخلاقی بیان دینے سے پرہیز کرنا چاہیے۔
احسن اقبال نے کہا کہ ن لیگ کو 10 سال پنجاب کی حکومت ملی، شہباز شریف نے 2008 سے 2018 تک لاہور کو روشنیوں کا شہر بنا دیا ۔ آج کوئی لاہور والا یہ نہیں چاہتا کہ لاہور کراچی بنے ۔لیکن کراچی کا ہر شہری چاہتا کہ کراچی لاہور بنے۔
انہوں نے کہاکہ لاڑکانہ پیپلزپارٹی کی سیاست کا مرکز ہے، میں نے چیلنج کیا ہے کہ بلاول میرے نارووال کا اپنے لاڑکانہ سے مقابلہ کر لیں، اگر لاڑکانہ نارووال سے بہتر ہوا تو میں سیاست چھوڑ دوں گا اور اگر میرا نارووال ان کے لاڑکانہ سے بہتر ہو تو انہیں سیاست چھوڑ دینی چاہیے۔
