راولپنڈی:بانی چیئرمین پی ٹی آئی عمران خان نے کہا ہے کہ جس طرح نواز شریف کو لایا گیا ہے، تاریخ میں اس طرح کی سلیکشن پہلے کبھی نہیں ہوئی۔
اڈیالہ جیل میں سائفر کیس کی سماعت کے بعد میڈیا کے نمائندوں سے بات کرتے ہوئے سابق وزیراعظم اور بانی پی ٹی آئی عمران خان کا کہنا تھا کہ ہمیں ساڑھے 3 سال تک سلیکٹڈ کہہ کر پکارا گیا، لیکن جس طرح سے نواز شریف کو لایا گیا ہے، یہ تو مدر آف آل سلیکٹڈ ہو رہا ہے۔ ملک کی تاریخ میں ایسی سلیکشن کبھی نہیں ہوئی۔
انہوں نے کہا کہ ایک سرٹیفائیڈ منی لانڈرر کے تمام مقدمات کو ختم کردیا گیا ہے جب کہ نگراں حکومت اور الیکشن کمیشن بھی ایسے مجرم کی معاونت کررہے ہیں۔ عمران خان نے کہا کہ سی سی پی او لاہور اس سرٹیفائیڈ مجرم کو سلیوٹ کررہا ہے۔ یہ ہمیں غلام بنا رہے ہیں، میں پوری پارٹی کو کہتا ہوں کہ وہ اتوار کو باہر نکلے۔
عمران خان نے کہا کہ جمہوریت کا مطلب آزادی اور غلامی نامنظور ہے۔ ہم قانون کی حکمرانی کی مہم چلا رہے ہیں اور قانون کی حکمرانی بھی آزادی ہی کی ضامن ہوتی ہے، مگر یہ چور کبھی اس ملک میں انصاف اور قانون کی حکمرانی نہیں ہونے دیں گے۔
