خانیوال: مسلم لیگ ن کی چیف آرگنائزر مریم نواز نے کہا ہے کہ آج ہمارے سامنے میدان میں کوئی مقابلہ کرنے والانہیں ہے۔
انتخابات کے سلسلے میں عوامی جلسے سے خطاب کرتے ہوئے ن لیگ کی سینئر نائب صدر مریم نواز نے کہا کہ جو لوگ لیول پلیئنگ فیلڈ اور انتقامی سیاست کا الزام عائد کررہے ہیں، وہ بتائیں کہ کیا نواز شریف نے انہیں کہا تھا کہ 9 مئی کو ریاست پر حملہ کرو، کیا یہ بات نواز شریف نے کہی تھی کہ سائفر کو لہراؤ؟۔
مریم نواز نے کہا کہ پارٹی سے محبت کرنے والوں نے ساتھ نہیں چھوڑا، اس لیے نواز شریف ملک میں واپس آئے۔ سیاست میں اونچ نیچ آتی رہتی ہے لیکن اصل رہنما اور سیاسی کارکن اسے کہتے ہیں جو میدان میں کھڑا رہے، چھوڑ کر نہ جائے بلکہ ڈٹ کر مقابلہ کرے۔
لیگی رہنما کا کہنا تھا کہ مخالفین کہتے ہیں مہنگائی اتنی بڑھ چکی ہے لوگ ن لیگ کے ساتھ نہیں نکلیں گے مگر دیکھ لیں اوکاڑہ، حافظ آباد یا خانیوال، عوام کا سمندر بتارہا ہے کہ مہنگائی کی ذمے دار ن لیگ نہیں ہے۔ آج ہمارے سامنے میدان میں مقابلہ کرنے والا کوئی نہیں۔یہ لوگ جوتیاں چھوڑ کر بھاگ نکلے۔مجھے گرفتار کیا گیا اور ماں کی موت کی خبر جیل میں ملی۔ 5 سال جیلیں بھگتیں مگر میں نے اپنے باپ کا سرجھکنے نہیں دیا۔
