کراچی سے لاہور جانے والی شالیمار ایکسپریس حادثے کا شکار ہو گئی،تین بوگیاں پٹڑی سے اترگئیں ، اپ اینڈ ڈائون ٹریک بند ہو گئے ،کوئی جانی نقصان نہیں ہوا۔
ترجمان ریلوے کے مطابق کراچی کے علاقے بن قاسم کے قریب شالیمار ایکسپریس کی 3 بوگیاں پٹری سے اتر گئیں، تاہم کوئی جانی نقصان نہیں ہوا۔
شالیمار ایکسپریس کی بوگیاں پٹڑی سے اترنے کے بعد اپ اینڈ ڈائون ٹریک بند ہو گئے ، حادثے کے باعث پشاور سے آنے والی خیبر میل کو جنگ شاہی سٹیشن ، پشاور جانے والی عوام ایکسپریس کو جمعہ گوٹھ اسٹیشن اور حویلیاں جانے والی ہزارہ ایکسپریس کو بن قاسم پر روک دیا گیا۔
واضح رہے کہ شالیمار ایکسپریس کو گزشتہ 2 ہفتوں کے دوران سندھ میں یہ دوسرا حادثہ ہے، گزشتہ منگل کو بھی سندھ میں پڈ عیدن کے قریب اسی چلتی ٹرین کی ٹرالی ٹریک پر گرگئی تھی۔
