دیر:امیر جماعت اسلامی پاکستان سراج الحق نے کہا ہے کہ سابقہ حکمران پارٹیوں نے سیاست کو شطرنج کا کھیل بنایا ہے، الیکشن میں ان کی کامیابی عوام کی ناکامی ہو گی، سابقہ حکمرانوں نے قانون کی بجائے اپنی بادشاہتیں قائم کیں، اب یہ دوبارہ انہی خواہشات کی تکمیل کے لیے عوام سے ووٹ مانگ رہے ہیں۔
مدرسہ حیاة المسملین تیمرگرہ میں تقریب تکمیل بخاری سے خطاب کرتے ہوئےسراج الحق نے کہاکہ سوشل میڈیا نے نااہل حکمرانوں کے چہروں سے نقاب اتار دیے ہیں، قوم 8فروری کو سٹیٹس کو کے خاتمے کے لیے ووٹ کرے گی، ترازو امن، انصاف اور خوشحالی کی ضمانت ہے۔
امیر جماعت اسلامی پاکستان کا کہنا تھا کہ سابقہ حکومتوں نے قوم کو قرضوں کی زنجیروں میں باندھا، یہ آئی ایم ایف، ورلڈ بنک سے قرضے لائے اور اپنے اثاثوں میں اضافہ کیا، ادائیگی کے لیے عوام کی جیبوں پر ڈاکہ ڈالا جا رہا ہے۔
انہوں نے مزید کہاکہ ن لیگ، پیپلزپارٹی اور پی ٹی آئی معیشت کی تباہی، مہنگائی اور بے روزگاری میں برابر کی شریک ہیں، انھوں نے ناکام حکومتیں کیں اور ڈلیور نہیں کر سکیں، ملک کا مسئلہ وسائل کی کمی نہیں اسے اچھی حکمرانی درکار ہے۔
سراج الحق کا کہنا تھا کہ جماعت اسلامی اداروں میں اصلاحات پر یقین رکھتی ہے، ٹیکسوں کا موجودہ نظام فرسودہ ہے، اقتدار میں آ کر عوام کی کرپٹ سسٹم سے جان چھڑائیں گے، وسائل کا رخ شہریوں کی فلاح و بہبود کی طرف موڑا جائے گا، زمین اور کارخانوں کی پیداوار کے منافع میں ہاریوں اور مزدوروں کو شریک کریں گے۔ امیر جماعت نے کہا کہ اللہ تعالیٰ نے عوام کو اپنی تقدیر بدلنے کا موقع فراہم کیا ہے، گزشتہ سات دہائیوں سے ان پر مسلط کرپٹ طبقات سے جان چھڑانے کا بہترین موقع 8فروری کا دن ہو گا۔
