ٹوکیو: جاپانی ماہرین نے آتشزدگی کے واقعات میں آگ بجھانے کے لیے فلائنگ ڈریگن روبوٹ بنا لیا۔
خبر رساں اداروں کے مطابق روبوٹ بنانے والے تحقیق کاروں نے آگ بجھانے کے لیے ایک ایسا جدید روبوٹ (فائر فائٹننگ ہوز) تیار کیا ہے، جو آگ بجھانے کے لیے استعمال ہونے والے پانی کے پریشر کو استعمال کرتے ہوئے اُڑ کر اپنی سمت کا خود تعین کرے گا۔
اوساکا یونیورسٹی جاپان اور اکیتا پرفیکچوئل یونیورسٹی کے سائنس دانوں کے ایجاد کیے گئے اس فلائنگ ڈریگن سسٹم میں 2 چار منہ والے پروپلژن یونٹس دونوں جانب نصب کیے گئے ہیں، جو آبی کواڈ کاپٹر کی طرح کام کرتے ہیں اور اس میں ہر نوزل میں لگے والو اور سویولز (ایسی اٹکل جس سے نوزل ہر جانب گھوم سکتا ہے) پانی کے بہاؤ اور تھرسٹ کی سمت کو کنٹرول کرتے ہیں جو اس کو عام ڈرون کی طرح اٹھنے، توازن قائم کرنے اور سمت کا تعین کرنے کے قابل بناتا ہے۔
فلائنگ ڈریگن سے متعلق بتایا گیا ہے کہ فی سیکنڈ 6.6 لیٹر کی شرح سے پانی کا بہاؤ 1 میگا پاسکل تک پریشر دیتا ہے جو اس ہوز کے زمین سے دو میٹر تک اٹھنے کے لیے کافی ہے۔یہ نمونہ 4 میٹر طویل ہے اور ایک چھوٹے سے کنٹرول اسٹیشن ٹرالی سے جڑا ہوا ہے جہاں ایک آپریٹر کھڑے ہوکر ڈرون چلاتا ہے۔
آپریٹر اس ڈریگن کے سر پر نصب ریگولر اور تھرمل ویژن رکھنے والے کیمرے کو استعمال کرتے ہوئے معاملات کا جائزہ لیتے ہیں اور وہاں پانی کے چھڑکاؤ کو یقینی بناتے ہیں جہاں زیادہ ضرورت ہوتی ہے۔
