لاہور: پی ایس ایل 9 کے سلسلے میں کھلاڑیوں کی ڈرافٹنگ 13 دسمبر کو ہوگی۔
نجی ٹی وی کی رپورٹ کے مطابق پاکستان سپر لیگ کے 9 ویں ایڈیشن کے لیے کھلاڑیوں کی ڈرافٹنگ آئندہ ماہ 13 تاریخ کو نیشنل کرکٹ اکیڈمی لاہور میں ہوگی، جس کے لیے پک آرڈر کو فائنل کرلیا گیا ہے۔
پک آرڈر کے مطابق کوئٹہ گلیڈی ایٹرز کو ڈرافٹ میں پہلے کھلاڑی کا انتخاب کرنا ہے۔
پلاٹینم کیٹیگری کے لیے پہلے راؤنڈ کا سلیکشن آرڈر پچھلے سیزن کی آخری ٹیم سے پہلی ٹیم کی اسٹینڈنگ کے مطابق ہوگا۔
ایچ بی ایل پاکستان سپر لیگ میں مقامی کھلاڑیوں کو برقرار رکھنے کا عمل 10 نومبر کو مکمل ہوچکا ہے جب کہ غیرملکی کرکٹرز کی رجسٹریشن 25 اکتوبر سے شروع ہوگئی تھی جس میں کئی ٹاپ کھلاڑیوں نے دلچسپی ظاہر کی ہے۔
علاوہ ازیں بدھ کے روز کراچی کنگز اور اسلام آباد یونائیٹڈ کے درمیان ٹریڈ کے نتیجے میں حسن علی اسلام آباد یونائیٹڈ سے کراچی کنگز میں آئے ہیں جب کہ عماد وسیم اسلام آباد یونائیٹڈ میں شامل ہوئے ہیں۔
یاد رہے کہ پی ایس ایل 9 کے انعقاد کی ابتدائی تاریخ8 فروری تا 24 مارچ دی گئی ہے۔
