کراچی(رپورٹ:منیر عقیل انصاری) کراچی پریس کلب اور سندھ بوائےاسکاؤٹس ایسوسی ایشن کے تعاون سے صحافیوں کے بچوں کیلئےدو روزہ اسکاؤٹ تربیتی کیمپ کا انعقاد گلستان اسکاؤٹ ٹرینگ سینٹر گلشن اقبال کیا گیا۔تربیتی کیمپ میں شریک بچوں کواسکاؤٹ کی بنیادی تربیت کے ساتھ فرسٹ ایڈ،فائرفائیٹنگ،سیلف ڈیفنس، کیریئرکونسلنگ، کیمپنگ، ہنگامی ریسکیو، ورزش، گیمز، بون فائر، کمانڈو ریس، ایمرجنسی ریسپانس، مسینجر آف پیس، ایڈوینچر ٹریل سمیت دیگر غیر نصابی سرگرمیاں کرائی گئیں۔ بچے بچیاں سمیت والدین نے بھی کیمپ میں ہونے والی مختلف سرگرمیوں میں حصہ لیا۔
تقریب کا آغاز سید اسال احمد کی تلاوت کلام پاک سے ہوا جبکہ شریف آئرہ عاصم نے ہدیہ نعت پیش کی اس موقع پر تمام حاضرین نے منظر عباس، عالم صائم اور آصف محمود مرزا کے کیساتھ قومی ترانہ پڑھا۔ کیمپ کی اہم بات کہ دو روزہ اسکاؤٹس کیمپ کو فلسطین میں شہید ہونے والے صحافیوں سے منسوب کیا گیا تھااور بچوں کے خیمے شہید صحافیوں کے ناموں سے الاٹ کئےگئےتھے۔
اسکاؤٹس تربیتی کیمپ کے اختتامی تقریب کے موقع پر کراچی پریس کلب کےصدرسعید سربازی،سیکرٹری شعیب احمد، ممبر گورننگ باڈی رمیز وہرہ، کلثوم جہاں، کراچی پریس کلب اسکاؤٹس کیمپ انتظامی کمیٹی کے سربراہ خلیل احمد ناصرواراکین میں منیر عقیل انصاری، نذیر احمد عباسی، سیدعامراشرف، محمدعادل سلطان، قاضی ناصر، عثمان احمد، سندھ بوائے اسکاؤٹس ایسوسی ایشن کے پیٹرن چیف، کراچی اوپن ڈسٹرکٹ اسکاؤٹس کمشنر اور جامعہ کراچی کے ڈین فیکلٹی آف لاء جسٹس ریٹائرڈ حسن فیروز،سندھ بوائے اسکاؤٹس ایسوسی ایشن کے سیکرٹری سید اختر میر، گلشن اقبال ٹاؤن کے چیئرمین ڈاکٹر فواد احمد ،گلستان اسکاؤٹس ٹریننگ سینٹر میں بچوں کو دو روزہ تر بیت دینے والے اراکین (اسکاؤٹ لیڈرز ٹرینر) آصف محموداحمد مرزا،عالم صائم،مرزا شبیر مقصودی،عظمی وقار،نصرت فاطمہ،ناصر جمال،مصیب بیگ،سعید احمد سمیت صحافیوں اور ان کے اہل خانہ کی بڑی تعداد موجود تھیں۔
کراچی پریس کلب اور سندھ بوائے اسکاؤٹس ایسوسی ایشن کے زیر اہتمام کراچی پریس کلب کے اراکین کے بچوں کیلئے دوروزہ اسکاؤٹ کیمپ کا 4 نومبر ہفتہ کی صبح آغاز کیا گیا، بچے اور بہت سے والدین دوروز تک خیموں میں رہے اور اس دوران بچوں نے عملی زندگی کے مختلف مراحل کا مشاہدہ بھی کیا، تربیت کے دوران بچوں کو معاشرے کا بہترین فرد بنانے کے لیے ان کی کردار سازی کے مختلف اْمور سے روشناس کرایاگیا۔کیمپ میں شرکت کے لئے بچے ہفتہ کی صبح اور بچیاں اتوار کی صبح بڑے جوش وخروش کے ساتھ گلستان اسکاؤٹ کیمپ تشریف لائیں۔جہاں پر سینئر اسکاؤٹس لیڈر ز نےتربیت فراہم کی۔ اسکاؤٹ کیمپ میں 150 سے زاید بچے اور بچیوں نے شرکت کی۔
اسکاؤٹس کیمپ میں شریک بچوں کا کہنا تھا کہ اسکاؤٹ کیمپ میں آکر ہمیں بہت مزہ آیا ہے اور بہت سی چیزیں سیکھنے کو ملیں ہیں، بچوں نے اس طرح کے مزید اسکاؤٹنگ کو جاری رکھنے کا بھی مطالبہ کیا ہے۔
اختتامی تقریب سے خطاب کرتے ہوئے کراچی پریس کلب کے صدر سعید سربازی نے کہا کہ جلد ہی ہم کراچی پریس کلب اسکاؤٹ کو سندھ بوائے اسکاؤٹس ایسوسی ایشن میں رجسٹرڈ کراوکر اپنے ممبران کواسکاؤٹس کی تربیت فراہم کریں گےتاکہ اراکین پریس کلب اور ان کے بچے اسکاؤٹ کی تربیت حاصل کر کے پا کستان کی تعمیر ترقی میں اپنا بھر پور کردار ادا کرسکیں۔
ان کا کہنا تھا کہ اسکاؤٹنگ کی تربیت، مہارت اور اقدار کسی مخصوص جغرافیائی یا ثقافتی حد بندی کی پابند نہیں ہوتیں اور آج اتنی بڑ تعداد میں اراکین پریس کلب اور ان کے بچوں کو یہاں دیکھ کر مجھے بہت خوشی ہوئی ہے۔ میں پریس کلب اسکاؤٹس کیمپ کی انتظامی کمیٹی اور ٹرینرز کو کامیاب اسکاؤٹس کیمپ کے انعقاد پر مبارکباد پیش کرتا ہوں۔
تقریب سے سیکرٹری کراچی پریس کلب شعیب احمد نے کہا کہ کراچی پریس کلب اپنے اراکین اور ان کے اہل خانہ کے لیے اس طرح کی سرگرمیاں کا انعقاد مختلف اوقات میں سال بھر جاری رکھتا ہے ،کراچی پریس کلب پاکستان کا وہ واحد پریس کلب ہے جہاں اراکین اور ان کے اہل خانہ کو اسکاؤٹس کی تربیت فراہم کی جاتی ہے،انہوں نے اپنے خطاب میں کیمپ کی بہت تعریف کی ٹریننگ ٹیم کی تربیت کو سراہا اور آئندہ بھی اس طرح کی ایکٹویٹی جاری رکھنے کا اعادہ کیا۔
انہوں نے اعلان کیا کہ کراچی پریس کلب کا سب بڑا اور میگا ایونٹ کراچی پریس کلب فیملی گالا 2023 کا انعقاد25 نومبر بروز ہفتہ کراچی پریس کلب میں ہوگا جس میں سندھ بوائے اسکاؤٹس ایسوسی ایشن کے ساتھ مل کر اس تقریب کی سیکورٹی اور سیفٹی کے انتظامات کیے جائے گے۔اور اپنے اراکین کے لیے فیملی گالا کو ایک یاد گار تقریب بنائیں گے۔انہوں نے کامیاب اسکاؤٹس کیمپ کے انعقاد پر سندھ بوائے اسکاؤٹس ایسوسی ایشن اور کراچی پریس کلب کی انتظامی کمیٹی کہ اراکین کا شکریہ ادا کیا اور کہا کہ مجھے امید ہے کہ آئندہ بھی اس طرح کے اسکاؤٹس کیمپ کے انعقاد کے لیے سندھ بوائے اسکاؤٹس ایسوسی ایشن کے سیکرٹری سید اختر میر سمیت تمام دوستوں کا تعاون حاصل رہے گا۔
اختتامی تقریب سے خطاب کرتے ہوئے سندھ بوائے اسکاؤٹس ایسوسی ایشن کے پیٹرن چیف اورکراچی اوپن ڈسٹرکٹ کے اسکاؤٹس کمشنر جسٹس ریٹائرڈ حسن فیروز نے کہا کہ مجھے خوشی ہے کہ کراچی پریس کلب اپنے اراکین کے بچوں کے لیے اس طرح کی سرگرمیوں کا انعقاد کرتی ہے۔ہمارا ٹرینگ سینٹر کراچی پریس کلب کے صحافیوں کے لیے ہر وقت حاضر ہے کراچی پریس کلب اسکاؤٹ کی ٹیم کو ہم ہر طرح سے سپورٹ کر نے کو تیا ر ہیں ۔
ان کا کہنا تھاکہ اسکاؤٹس کیمپ اسکاؤٹنگ کے ذریعے بہتر معاشرتی تعلقات اور نوجوانوں کی ترقی کو فروغ دیتا ہے۔ اس دو روزہ کیمپ کے دوران بچوں میں قائدانہ کردار، مل جل کر کام کرنے،خود انحصاری اور کئی اہم مہارتوں کے بارے میں تربیت فراہم کی جاتی ہے۔ اسکاؤٹنگ ایک بین الاقوامی تحریک ہے جو افراد کی ہمہ گیر تربیت خصوصاً جسمانی،ذہنی اور جذباتی صلاحیتوں کو نکھارتی ہے۔اسکاؤٹنگ کے ادارے کئی دہائیوں سے زندگی کے ہر شعبے میں قائدانہ کردار کے حامل افراد تیار کر رہے ہیں۔
سندھ بوائے اسکاؤٹس ایسوسی کے صوبائی سیکرٹری سید اختر میر نے کہا کہ اسکاؤٹس کیمپ کا مقصد بچوں میں چھپی صلاحتیوں کو نکھارناہے۔ہمیں بچوں کو آگے لانا ہو گا کیوں کہ مستقبل ان ہی بچوں کا ہے اور آئندہ ملک کی باگ دوڑ اورقیادت ان ہی کے ہاتھوں میں ہو گی، اسکاؤٹنگ بچوں میں نظم و ضبط، وقت کی پابندی اور اصولوں کی پاسداری پیدا کرتی ہے جبکہ اس سے بچوں کو منفی سرگرمیوں سے بھی محفوظ رکھا جاسکتا ہے۔اسکاؤٹنگ کا مقصد نوجوانوں کی جسمانی، ذہنی اور روحانی صلاحیتوں کو اجاگر کرکے مقامی، قومی اور بین الاقوامی سطح پر انہیں معاشرے کی بہتری کے لیے استعمال کرنا ہے۔
ان کا کہنا تھا کہ آج اسکاوٹس تحریک پروان چڑھ رہی ہے بچوں اور نوجوانوں کی بڑی تعداد اس تحریک میں شامل ہو رہی ہے ہمارے تربیتی مراکز پر سارا سال تربیت کا سلسلہ جاری رہتا ہے۔دور وزہ کراچی پر یس کلب اسکاؤٹ کیمپ کے دوران بچوں کو مختلف سرگرمیاں کرائی گئی ہیں جس سے ان بچوں کوکچھ نیا سیکھنے کا موقع ملا ہے۔
اسکاؤٹس کیمپ کی اختتامی تقریب میں شریک گلشن اقبال ٹاؤن کے چیئرمین ڈاکٹر فواد نے کہا کہ یہ میرے لیے خوشی کا موقع ہے کہ کراچی پر یس کلب کی جانب سے اپنے اراکین اور ان کے بچوں کے لیے ایک صحت مند سرگرمیوں کا انعقاد کیا اور مجھے اس تقریب میں شرکت کا موقع فراہم کیا گیا ہے۔ یہ میرے لیے اعزاز کی بات ہے۔
ان کا کہنا تھا کہ جس طرح کراچی پریس کلب اپنے اراکین کے لیے اس طرح کی سرگرمیوں کرتیں ہیں اور پریس کلب کو ایک فیملی کلب کی طرح سمجھاجاتا ہے میں سمجھتا ہوں کہ اسطرح کا جذبہ پاکستان کے دیگر اداروں میں بھی ہوناچاہیے اور ایک فیملی کی طرح تمام تر سرگرمیوں کا انعقاد ہونا چاہیے۔
ڈاکٹر فواد کا کہنا تھا کہ ہمارا عزم ہے کہ ہم اپنے گلشن اقبال ٹاؤن سمیت پورے کراچی کو ایک گلشن کے مانند بنائے گے اور اس شہر کو صاف ستھرا شہر اور کراچی کی پہچان کو واپس لائیں گے۔ جس کے لیے مجھے امید ہے کہ کراچی پریس کلب کے صحافی دوست ہمارے ساتھ تعاون کریں گے اور جو کمی کوتاہی نظرآرہی ہو اس کی نشاندہی کریں گے۔
اسکاؤٹس کیمپ انتظامی کمیٹی کے سربراہ خلیل ناصر نے مختصر خطاب میں پریس کلب ۔سید اختر میر اور ان کی ٹیم کا خصوصی شکریہ ادا کیا۔
آخر میں کراچی پریس کلب کے صدر سعید سربازی سیکرٹری شعیب احمد نے سندھ بوائے اسکاوٹس ایسوسی ایشن کے سیکرٹری سید اختر میر ، اسکاؤٹس لیڈرز اور کیمپ کو کامیاب بنانے میں مدد کرنے والے تمام شراکت داروں اور دیگر مہمانوں کا شکریہ ادا کیا۔ اختتامی تقریب میں کراچی پریس کلب کے صدر سیکرٹری اور اراکین گورننگ باڈی کو سندھ بوائے اسکا ؤ ٹس ایسویس ایشن کی جانب سے اسکارف، یادگاری سوینیئر اور سرٹیفکیٹ پیش کیے گئے۔ دو روزہ اسکاؤٹس کیمپ میں تربیت دینے والے سینئر اسکاؤٹس لیڈرز کو ان کی خدمت کے اعتراف میں انہیں یادگاری مڈل، بیگ اورسرٹیفکیٹ سے نوازا گیا، اسکاؤٹس کیمپ میں قابلِ ستائش صلاحیتوں کا مظاہرہ کرنے والے بچوں کو یادگاری شیلڈ،بیگ اور اسناد پیش کی گئیں ،جبکہ اسکاؤٹس کیمپ میں شریک تمام بچوں کو تربیتی سرٹیفکیٹ دیئے گئے۔
