کراچی: سابق وزیر خارجہ و چیئرمین پاکستان پیپلز پارٹی بلاول بھٹو زرداری نے کہا ہے کہ سب کو الیکشن کا چاند مبارک ہو، اگلی باری پیپلز پارٹی کی ہوگی۔
بلاول بھٹو زرداری کا کہنا تھا کہ بہتر ہوتا الیکشن کمیشن خود ہی اعلان کر دیتا، عدالت کو مداخلت نہ کرنا پڑتی۔ اب 8 فروری کو انتخابات ہونے چاہئیں، کسی ایک الیکشن میں بھی پیپلز پارٹی کو لیول پلیئنگ فیلڈ نہیں ملی، اُمید ہے اس دفعہ ہمیں لیول پلیئنگ فیلڈ ملے گی۔
چیئرمین پی پی پی نے مولانا فضل الرحمان سے متعلق سوال کے جواب میں کہا کہ تاریخ بھی آچکی ہے اور موسم بھی ٹھیک ہے، پیپلز پارٹی کی انتخابی اور عوامی رابطہ مہم جاری رہے گی، میں نے الیکشن کمیشن کو انتخابات کی تاریخ دینے کی تجویز دی تھی، میثاق جمہوریت پر سب جماعتوں کو آنا چاہیے۔
بلاول بھٹو کا کہنا تھا کہ اصولی طور پر ہر سیاسی جماعت کو لیول پلیئنگ فیلڈ ملنی چاہیے، پی ٹی آئی سے اتحاد کے حوالے سے پیپلزپارٹی نے کوئی فیصلہ نہیں کیا، کسی بھی غیرقانونی کام کا ساتھ کوئی جماعت نہیں دے سکتی، ہیومن رائٹس پر پیپلز پارٹی کا سخت موقف ہے۔
سابق وزیر خارجہ نے کہا کہ انسانی حقوق کا واویلا کرنے والے ممالک فلسطینیوں پر اسرائیلی بربریت پر کیوں خاموش ہیں، انسانی حقوق کے حوالے سے سوالات اٹھ رہے ہیں۔
