کراچی: ثانوی تعلیمی بورڈ کراچی نے سالانہ امتحانات سال 2023ء ایس ایس سی پارٹ ٹو (جماعت دہم) سائنس و جنرل گروپ ریگولر اور پرائیویٹ کی مارکس شیٹس جاری کرنے کا اعلان کر دیا ہے۔
تفصیلات کے مطابق چیئرمین ثانوی تعلیمی بورڈ سید شرف علی شاہ کی ہدایت کے مطابق قائم مقام ناظم امتحانات خالد احسان نے تمام الحاق شدہ تعلیمی اداروں کے سربراہان سے کہا ہے کہ وہ10نومبر سے دیئے گئے شیڈول کے مطابق اپنے اتھارٹی لیٹر کے ساتھ بورڈ آفس کی پہلی منزل بلاک B کانفرنس ہال سے صبح 9:30 بجے سے شام 4:00بجے تک اورہفتے کے روز صبح10:00بجے سے سہ پہر2:00بجے تک مارکس شیٹس حاصل کر سکتے ہیں۔
بورڈ سے الحاق شدہ تمام اسکول اور گورنمنٹ اسکول کے ماتحت آنے والے اسکولوں کے سربراہان یا ان کے بااختیار نمائندے مارکس شیٹس حاصل کرنے کیلئے ہیڈ ماسٹر/مسٹریس کی دستخطی مہر اور اتھارٹی لیٹر اپنے ساتھ لازمی لے کر آئیں اس کے بغیر ان کو مارکس شیٹس جاری نہیں کی جائیں گی۔
شیڈول کے مطابق جمعہ10نومبر کو نیو کراچی، نارتھ ناظم آباد، گلبرگ، لیاقت آباد۔ ہفتہ11نومبر کو جمشید ٹاؤن، گلشن اقبال،شاہ فیصل۔پیر 13نومبر کو لانڈھی، کورنگی، ملیر، بن قاسم اورمنگل 14نومبر کوصدر، لیاری، کیماڑی، سائٹ، اورنگی ٹاؤن،بلدیہ ٹاؤن، گڈاپ کی مارکس شیٹس حاصل کر سکیں گے جبکہ تمام پرائیویٹ امیدواروں کی مارکس شیٹس ان کے دیئے گئے رہائشی پتوں پر ارسال کی جائیں گی۔
