کراچی: پیپلز پارٹی کراچی کے صدر سعید غنی نے کہا ہے کہ متحدہ قومی موومنٹ (ایم کیو ایم)کو پاک سرزمین پارٹی (پی ایس پی)مافیا نے ہائی جیک کرلیا ہے، روشنیوں کے شہر کو دہشت گردی میں دھکیلنے والی متحدہ قومی موومنٹ ہے۔
سعید غنی نے کہا کہ ایم کیو ایم ، کراچی کی سیاست کا مردہ گھوڑا ہے، جس نے بوری بند لاشوں اور بھتہ خوری کو اپنی شناخت مانا ہے، ایم کیو ایم شدید اندرونی انتشار کا شکار ہے، کراچی کے ضمنی انتخابات کے نتائج نے ایم کیو ایم کو بلدیاتی انتخابات سے بھاگنے پر مجبور کیا۔
انہوں نے کہاکہ ایم کیو ایم ایک مرتبہ پھر دہشت گردی اور دھاندلی سے الیکشن جیتنے کے خواب دیکھ رہی ہے، ایم کیو ایم، چھوڑنے والے کارکنوں کو دھمکیاں دے کر واپس آنے کا دباؤ ڈال رہی ہے، اب کراچی میں متحدہ کی کوئی ڈرامے بازی نہیں چلے گی۔
