راولپنڈی: ژوب میں فائرنگ کے تبادلے میں 5 دہشت گرد ہلاک ہو گئے جب کہ میجر اور حوالدار نے جام شہادت نوش کیا۔
پاک فوج کے شعبہ تعلقات عامہ (آئی ایس پی آر) کے مطابق بلوچستان کے ضلع ژوب میں دہشت گردوں اور سیکورٹی فورسز کے مابین فائرنگ کا تبادلہ ہوا، جس میں ایک میجر اور حوالدار شہید ہو گئے جب کہ 5 دہشت گرد مارے گئے۔
آئی ایس پی آر کے مطابق انٹیلی جنس اطلاعات کی بنیاد پر سمبازہ میں آپریشن کیا گیا۔ اس دوران سیکورٹی فورسز نے دہشت گردوں کو گھیر لیا، جس پر فورسز اور دہشت گردوں کے درمیان فائرنگ کا تبادلہ ہوا۔
آپریشن کی قیادت کرنے والے میجر سید علی رضا شاہ اور حوالدار نثار احمد دہشت گردوں کا بہادری سے مقابلہ کرتے ہوئے شہید ہو گئے۔ میجر سید علی رضا شاہ کی عمر 31 برس اور ان کا تعلق ضلع سرگودھا سے تھا جب کہ حوالدار نثار احمد کی عمر 38 برس اور تعلق ضلع وہاڑی سے تھا۔
