میانوالی: رولپنڈی سے ملتان کے لیے جانے والی تھل ایکسپریس میانوالی کے نزدیک پٹڑی سے اتر گئی، تاہم ٹرین کسی بڑے حادثے سے بال بال بچ گئی۔
خبر رساں اداروں کے مطابق راولپنڈی سے ملتان جانے والی تھل ایکسپریس کی کچھ بوگیاں میانوالی ریلوے اسٹیشن کے قریب پٹڑی سے اترگئیں، تاہم خوش قسمتی سے حادثے میں کوئی بوگی الٹی اور نہ ہی کوئی جانی نقصان ہوا، تمام مسافر محفوظ رہے۔
حادثے کے بعد مسافروں کی جانب سے بنائی گئی ویڈیوز سے اندازہ ہوتا ہے کہ بوگیاں فش پلیٹیں اکھڑنے کی وجہ سے پٹڑی سے اتریں۔ بوگیاں پٹڑی سے اترنے کے بعد ٹرین رکی تو خوف زدہ مسافر نیچے اتر آئے جب کہ حادثے کی اطلاع ملتے ہی ریلوے انتظامیہ موقع پر پہنچ گئی۔
