راولپنڈی: پاکستان رینجرز نے بھارت کی طرف سے اسمگلنگ کی بڑی کارروائی ناکام بناتے ہوئے 6 بھارتی اسمگلر کو گرفتار کرلیا۔
پاک فوج کے شعبہ تعلقات عامہ (آئی ایس پی آر)کے مطابق 29 جولائی تا 3 اگست دراندازی کی کوششوں میں 6 بھارتی اسمگلروں کو گرفتار کرلیا گیا ، گرفتار بھارتی شہری منشیات اور ہتھیاروں کی اسمگلنگ میں ملوث ہیں، گرفتار بھارتی شہریوں میں فیروزپور کے رہائشی گرمیج سنگھ، شندر سنگھ، جگندر سنگھ، وشال سنگھ شامل ہیں۔
آئی ایس پی آر کے مطابق جالندھر کا رہائشی مہندر سنگھ اور لدھیانہ سے تعلق رکھنے والا گروندر سنگھ بھی گرفتار افراد میں شامل ہے۔
اس حوالے سے آئی ایس پی آر نے کہا کہ گرفتار اسمگلروں کے خلاف پاکستان میں غیر قانونی داخلے اور پاکستان میں ریاست مخالف سرگرمیوں پر کارروائی ہوگی، بھارتی اسمگلروں کی بی ایس ایف کے زیرِ نگرانی بارڈر سے بلا روک ٹوک نقل و حرکت حیران کن ہے۔
آئی ایس پی آر کے مطابق بھارتی بی ایس ایف کا اسمگلروں کے ساتھ ممکنہ گٹھ جوڑ بعیداز قیاس نہیں، توقع ہے کہ بی ایس ایف بارڈر پر نگرانی کا نظام موثر اور اسمگلروں کے ساتھ گٹھ جوڑ ختم کرے گی۔
