لاس اینجلس:لاس اینجلس اولمپکس 2028 میں کرکٹ کی شمولیت کے امکانات بڑھ گئے۔
برطانوی میڈیا کے مطابق کرکٹ کے اولمپکس 2028 میں شمولیت کے امکانات بڑھ گئے تاہم اولمپکس میں کرکٹ کی شمولیت کا فیصلہ ستمبر میں کیا جائے گا۔
رپورٹ کے مطابق کرکٹ سمیت 9 کھیلوں کی لاس اینجلس اولمپکس میں شمولیت کے لیے غور جاری ہے۔ انٹرنیشنل کرکٹ کونسل (آئی سی سی) نے مردو خواتین کی پانچ پانچ ٹیموں کے لیے ٹی ٹونٹی فارمیٹ کی تجویز دی ہے۔
عالمی میڈیا کے مطابق اولمپکس کے لیے 28 کھیلوں کو حتمی شکل دی جا چکی ہے جبکہ مزید کھیلوں کےلئے میزبان ملک کی تجویز آئی او سی منظور کر سکتی ہے۔ ایونٹ میں کرکٹ کی شمولیت کا مقصد ایشیا میں اولمپکس براڈ کاسٹ رائٹس کو بڑھانا ہے۔
یاد رہے کہ لاس اینجلس اولمپکس میں کرکٹ کی شمولیت کی صورت میں کرکٹ کو 1900 کے بعد پہلی مرتبہ کسی اولمپکس میں شامل کیا جائے گا، اس سے قبل 1900 کے المپکس میں برطانیہ اور فرانس کے مابین ایک میچ کھیلا گیا تھا۔
