کراچی: پاکستان کرکٹ ٹیم کے سابق کپتان شاہد آفریدی نے کولمبو میں فائنل میں بھارت کو شکست دے کر ایمرجنگ ایشیا کپ جیتنے پر پاکستان شاہینز کو مبارکباد دی۔
نجی ٹی وی پروگرام میں گفتگو کرتے ہوئے شاہد آفریدی نے جیت کو مستقبل کے اعتماد کے لیے اہم قرار دیا، کیونکہ پاکستان نے انڈین کھلاڑیوں کو شکست دی، جو انڈین پریمیئر لیگ (آئی پی ایل) میں باقاعدگی سے کھیل رہے ہیں۔
میڈیا ذرائع کےمطابق انہوں نے بتایا کہ دباؤ میں طیب طاہر کی اننگز سے متاثر ہوا ہوں جنہوں نے صرف 66 گیندوں پر سنچری سکور کی،یہ سنچری ایسے وقت میں جب قومی ٹیم 187 رنز پر پانچ وکٹیں گنوا چکی تھی۔
شاہد آفریدی نے بتایا کہ ان کی طیب طاہر سے اس وقت بات ہوئی تھی جب وہ نیوزی لینڈ کے خلاف سیریز کے چیف سلیکٹر تھے۔اگر سلیکٹرز کھلاڑیوں کی حوصلہ افزائی کرتے ہیں، یہاں تک کہ جب وہ منتخب نہیں ہوتے، تو وہ امید نہیں ہارتے اور محنت جاری رکھ سکتے ہیں۔ طیب طاہر نے اسپنرز کے خلاف بہت اچھا کھیلا، جیسا کہ انہوں نے نیوزی لینڈ کے انتخاب کے دوران دیکھا تھا کہ طیب اسپنرز کے خلاف زیادہ حاوی ہیں۔
سابق کپتان کا کہنا تھا کہ ان کھلاڑیوں کے لیے مستقل مزاجی بہت ضروری ہے، اس لیے نوجوان بلے بازوں کو ہر 4-5 میچوں کے بعد اسکور کرنے کا ہدف دینا چاہیے، جس سے وہ ذہنی طور پر بھی مضبوط ہوں گے۔ سفیان مقیم کی اچھی باؤلنگ پر بھی تعریف کرتے ہوئے کہا کہ پاکستان کے پاس 3-4 نوجوان بائیں ہاتھ کے اسپنرز ہیں، جن کا مستقبل روشن ہو سکتا ہے۔
