اسلام آباد: چیف جسٹس آف پاکستان (سی جے پی) عمر عطا بندیال نے ریمارکس دیئے کہ پاکستان آرمی ایکٹ 1952 سب پر لاگو نہیں ہوتا بلکہ مخصوص طبقے پر ہوتا ہے۔
چیف جسٹس پاکستان (سی جے پی) عمر عطا بندیال کی سربراہی میں جسٹس اعجاز الاحسن، جسٹس یحییٰ آفریدی، جسٹس منیب اختر، جسٹس مظاہر علی اکبر نقوی اور جسٹس عائشہ اے ملک پر مشتمل چھ رکنی بینچ نے کیس کی سماعت کی۔
9 مئی کو ملک بھر میں پھوٹنے والے پرتشدد فسادات کے سلسلے میں کی گئی گرفتاریوں کے بعد حکومت نے فوجی املاک کو نقصان پہنچانے اور ان پر حملہ کرنے کے مرتکب پائے جانے والوں کے خلاف فوجی عدالتوں میں ٹرائل کرنے کے اپنے فیصلے کا اعلان کیا۔
اس فیصلے کی روشنی میں پی ٹی آئی کے چیئرمین عمران خان سابق چیف جسٹس جواد ایس خواجہ، قانونی ماہر اعتزاز احسن اور پائلر کے ایگزیکٹو ڈائریکٹر کرامت علی سمیت سول سوسائٹی کے پانچ ارکان نے عدالت عظمیٰ سے فوجی ٹرائل کو “غیر آئینی” قرار دینے کی درخواست کی۔
سماعت کے دوران اے جی پی اعوان نے 9 مئی کے پرتشدد مظاہروں کے دوران ہونے والے نقصانات کے بارے میں تفصیلات کے ساتھ اپنے دلائل کا آغاز کیا، ایک بار پھر عدالت سے درخواست کی کہ معاملے کی سماعت کے لیے فل بنچ تشکیل دیا جائے۔
دریں اثنا، چیف جسٹس بندیال نے استفسار کیا کہ 9 مئی کے احتجاج سے منسلک کیسز میں کون سی دفعات لگائی گئیں۔؟
اس پر اٹارنی جنرل نے عدالت کو بتایا کہ پاکستان پینل کوڈ (پی پی سی) کی دفعہ 302 بھی مقدمات میں شامل کی گئی ہے کیونکہ ملزمان کے جرائم سول نوعیت کے نہیں تھے۔
جسٹس نقوی نے پھر پوچھا کہ کیا کوئی فوجی اہلکار احتجاج کے دوران شہید ہوا ؟ سوال کے جواب میں اے جی پی اعوان نے کہا کہ ایسی کوئی رپورٹ نہیں ہے۔
جب ان سے پوچھا گیا کہ اس دفعہ کو کیسے شامل کیا گیا جب فوجی اہلکاروں کی موت کی اطلاع نہیں ملی، انہوں نے کہا کہ وہ حکم کے مطابق اس معاملے پر دلائل نہیں دے رہے ہیں۔
اس پر چیف جسٹس بندیال نے اے جی پی کو بھی اس معاملے پر ہدایت طلب کرنے کا حکم دیا۔
بعد ازاں عدالت نے اعوان کو حکومت سے ہدایات لینے کے لیے 2 دن کی مہلت دیتے ہوئے سماعت جمعہ کی صبح 9:30 بجے تک ملتوی کردی۔
