کراچی؛ مردہ مرغیوں سے لدی ایک اور گاڑی پکڑی گئی، ڈرائیور گرفتار

کراچی: اسٹیل ٹاؤن پولیس نے نیشنل ہائی وے کے قریب چیکنگ کے دوران مردہ مرغیاں سپلائی کے لیے لے جانے والی سوزوکی پک اپ کو پکڑ کر اس میں رکھے گئے بوروں سے تقریباً 200 مردہ مرغیاں برآمد کر کے ڈرائیور کو گرفتار کرلیا ۔

مردہ مرغیاں ڈسٹرکٹ ملیر کے مختلف علاقوں کے ہوٹلوں میں سپلائی کی جانی تھیں، جو کہ پولیس نے بروقت کارروائی کرتے ہوئے پکڑ لیں۔ پولیس کے مطابق خفیہ اطلاع پر نیشنل ہائی وے سومار گوٹھ موڑ کے قریب گاڑیوں کی چیکنگ کی جا رہی تھی کہ گھارو سے کراچی آنے والی سفید رنگ کی سوزوکی پک اپ کو روک کر تلاشی لی گئی تو عقب میں رکھے ہوئے بوروں سے مردہ مرغیاں برآمد ہوئیں۔

پولیس نے گاڑی کے ڈرائیور رضوان کو گرفتار کر کے تھانے منتقل کر دیا اور اس کے خلاف سرکار کی مدعیت میں مقدمہ درج کرلیا ۔ گرفتار ڈرائیور نے ابتدائی تحقیقات میں بتایا کہ برآمد کی جانے والی مردہ مرغیاں ڈسٹرکٹ ملیر کے مختلف علاقوں گلشن حدید ، اسٹیل ٹاؤن اور ملیر سٹی سمیت ملحقہ علاقوں میں قائم ہوٹلوں پر سپلائی کی جاتی ہیں جب کہ مردہ مرغیاں مختلف پولٹری فارمز سے جمع کر کے کراچی سپلائی کی جاتی ہیں۔

واضح رہے کہ چند ہفتے قبل بھی عوامی کالونی پولیس نے مردہ مرغیوں سے لدی ہوئی مال بردار گاڑیوں کو پکڑ کر متعدد افراد کو گرفتار کیا تھا اور ان گرفتار ملزمان نے بھی یہی انکشاف کیا تھا کہ وہ مردہ مرغیوں کو نیشنل ہائی وے پر قائم مختلف ہوٹلوں پر سپلائی کرتے ہیں۔