۔2023 میں سیلاب کے خدشات موجود ہیں لیکن ہماری حکومت سیاسی رسہ کشی میں مصروف ہے، اسی طرح 2022 میں ماحولیاتی تبدیلی کی وجہ سے ماہرین نے یہ پیش گوئی کی تھی کہ پاکستان کی آب و ہوا مزید عدم استحکام کی طرف بڑھے گی، جو ہیٹ ویو اور اس کے بعد آنے والے سیلاب نے درست ثابت کردی۔ شدید بارشوں اور سیلاب سے تقریباً 33 ملین افراد متاثر ہوئے تھے۔ ملک کے کچھ حصے باقاعدہ بڑے پیمانے پر سیلاب سے دوچار ہوئے، جبکہ عوام خشک سالی اور پانی کی قلت سے لڑ رہے ہیں۔ عام طور پر سیلابی پانی کی ایک بڑی مقدار براہ راست پاکستان کے جنوبی ساحل میں بحیرہ عرب میں گرتی ہے۔ تاہم، ماہرین نے التجا کی ہے کہ ملک میں مزید آبی ذخائر تعمیر کر کے پانی کی قلت کو کم کرنے کے لیے سیلابی پانی کا استعمال کیا جا سکتا ہے۔ اسی سلسلے میں کئی رپورٹیں بھی تیار کی جا چکی ہیں۔ آنے والے برسوں سے سیلاب اور خشک سالی کے حوالے سے مسلسل انتباہ کے باوجود، پاکستان نئے ڈیموں کی تعمیر پر دہائیوں سے جاری سیاسی تصادم میں جکڑا ہوا ہے۔
1980 میں ضیاء الحق نے مستقبل کی پانی کی ضروریات کو پورا کرنے کے لیے دنیا کے سب سے بڑے ڈیم کی تعمیر کی تجویز پیش کی، جو مغربی تبت سے پورے پاکستان میں بہتا ہے۔ تین صوبوں نے اس منصوبے کی مخالفت کی جس کی وجہ سے یہ منصوبہ عملی شکل اختیار نہیں کر سکا۔ سندھ، بلوچستان اور خیبر پختون خوا کالا باغ ڈیم کے خلاف تھے جبکہ پنجاب تعمیر کے حق میں تھا۔ ڈیم پنجاب کی سرزمین پر بنے گا۔ سندھ تاریخی طور پر پنجاب پر پانی کی چوری کا الزام لگاتا رہا ہے۔ مزید یہ کہ سندھ کا یہ بھی مطالبہ ہے کہ دریائے سندھ پر مزید ڈیم نہ بنائے جائیں کیونکہ اس سے بہاؤ میں خلل پڑے گا۔ پنجاب کا خیال ہے کہ کالا باغ ڈیم نہ صرف پانی ذخیرہ کرے گا بلکہ پانی کی سنگین کمی کو دور کرنے میں بھی مدد دے گا۔ ہر سال گرمیوں میں، پاکستان کو بجلی کی شدید لوڈ شیڈنگ کا سامنا کرنا پڑتا ہے، زیادہ تر جنوبی پنجاب اور دیہی علاقوں میں جو صنعتوں کے کام کو متاثر کرتی ہے جو بالآخر ملک کی معیشت کو متاثر کرتی ہے۔ 2015 میں نواز شریف چینی سرمایہ کاری سے 46 ارب ڈالر مختص کر کے ڈیم کی تعمیر شروع کرنا چاہتے تھے لیکن بعد میں تین صوبوں کے شدید احتجاج کے باعث یہ منصوبہ ملتوی کرنا پڑا۔ جیسا کہ 1998 اور 2005 میں جنرل پرویز مشرف کے دور میں ہوا تھا۔ صوبائی سیاست کے علاوہ تکنیکی مسائل بھی تنازعے کی وجہ ہیں۔ اس کے علاوہ دیامر بھاشا ڈیم دوسرا مجوزہ منصوبہ تھا جو 2006 سے زمین کے حصول پر جھگڑے کی وجہ سے تعمیر نہیں ہو سکا۔ اسے شمالی اسکردو ضلع میں تعمیر کیا جانا تھا۔ پاکستان کے شمالی پہاڑوں میں مون سون کی شدید بارشوں اور گلیشیر پگھلنے کی وجہ سے ملک کے کئی حصوں میں سیلاب آیا تھا۔
موسمیاتی تبدیلیاں امیر ممالک کی وجہ سے ہوتی ہیں لیکن اس کا اثر امیر ممالک سے زیادہ غریب ممالک پر پڑتا ہے۔ غریب ممالک اپنے محدود وسائل کے ساتھ موسمیاتی تبدیلیوں سے کیسے نمٹیں گے اور طاقتور امیر ممالک کو ان کے اعمال کا جوابدہ کون ٹھیرائے گا جیسے سوالات میرے ذہن میں گونج رہے تھے۔ اگست 2022 میں پاکستان کی 15 فی صد سے زیادہ آبادی حیرت انگیز طور پر 33 ملین افراد موجودہ بارشوں اور سیلاب کی وجہ سے براہ راست متاثر ہوئے تھے۔ تباہی اس قدر زبردست ہے کہ کوئی بھی بیرونی امداد پاکستان کی مدد نہیں کر سکتی اور خواہ ہم امیر ممالک کو کتنا ہی قصوروار ٹھیرائیں، حقیقت یہ ہے کہ ہمیں ماحولیاتی تبدیلیوں سے خود نمٹنا ہے۔ تو کیا ہم شدید بارشوں یا سیلاب کو کنٹرول کر سکتے ہیں؟ جواب ہے: نہیں! لیکن کیا ہم جانیں بچا سکتے ہیں اور سیلاب میں ہونے والے نقصانات کو کم کر سکتے ہیں؟ جواب ہے، ہاں۔
دنیا بھر میں موسلا دھار بارشیں اور سیلاب آتے رہتے ہیں۔ اگست 2002 کے تباہ کن سیلاب کے بعد، یورپی یونین کے ماہرین نے بیٹھ کر ایک رپورٹ تیار کی سیلاب کی روک تھام، تحفظ اور تخفیف کے بہترین طریقہ کار تاکہ تمام یورپی ممالک اپنی کوششوں کو تیز کر سکیں۔ 30 صفحات پر مشتمل رپورٹ میں آٹھ بڑے شعبوں پر توجہ مرکوز کی گئی ہے جہاں نمایاں بہتری لائی جا سکتی ہے۔ ان میں 1۔ دریائی طاس کا مربوط نقطہ نظر، 2۔ عوامی آگاہی، عوامی شرکت اور انشورنس، 3۔ تحقیق، تعلیم اور علم کا تبادلہ، 4۔ پانی کی برقراری اور غیر ساختی اقدامات، 5۔ زمین کا استعمال، زوننگ اور خطرے کی تشخیص، 6۔ ساختی اقدامات اور ان کے اثرات، 7۔ فلڈ ایمرجنسی، 8۔ آلودگی کی روک تھام۔ ملک میں ایک تازہ بحث یہ ہے کہ اگر پاکستان مزید ڈیم بناتا تو صورتحال یکسر مختلف ہو سکتی تھی۔ سیلاب کے خلاف صرف تحفظ تک ہی پہنچا جا سکتا ہے۔ تو پاکستان میں کیا کیا جا سکتا ہے؟ جواب یہ ہے کہ پاکستان کی قیادت کو اپنی ترجیحات بدلنا ہوں گی۔
بدقسمتی سے، تبدیلی فوری طور پر نہیں آئے گی کیونکہ موسمیاتی تبدیلی سے متعلق مسائل ہماری ترجیحی فہرست میں آخری نمبر پر آتے ہیں۔ اس کا حل قلیل مدتی اور طویل مدتی منصوبہ بندی کے امتزاج میں مضمر ہے جس کے لیے فنڈز کو غیر پیداواری شعبوں سے پیداواری شعبوں کی طرف موڑنے کی بھی ضرورت ہے۔ اس سلسلے میں باخبر شہریوں کو بھی اپنا کردار ادا کرنا ہوگا کیونکہ جب تک وہ خاطر خواہ دباؤ نہیں بنائیں گے، ہماری قیادت اپنی ترجیحات میں تبدیلی لانے والی نہیں ہے۔ ریکارڈ شدہ تاریخ میں سیلاب تہذیب کا حصہ رہے ہیں۔ ہم سیلاب سے مکمل طور پر بچ نہیں سکتے۔ ہمیں ان کے ساتھ رہنا سیکھنا ہوگا، خاص طور پر اب جب موسمیاتی تبدیلی سے متعلق آفات متواتر آرہی ہیں۔
