اسلام آباد : پاکستان باسکٹ بال فیڈریشن نے 4 ملکی چیمپئن شپ میں شرکت کے لیے قومی باسکٹ بال ٹیم کے چناؤ کے لیے 5مئی سے ٹرائلز لینے کا فیصلہ کیا ہے۔
پاکستان باسکٹ بال فیڈریشن کے ایسوسی ایٹ سیکرٹری اوج ظہور کے مطابق 7 مئی تک پاکستان سپورٹس کمپلیکس اسلام آباد میں جاری رہنے والے 3 روزہ ٹرالز میں باسکٹ بال فیڈریشن سے الحاق شدہ ڈویژنز ، صوبوں اور ڈیپارٹمنٹس کے نامزد کردہ ٹاپ پلیرز حصہ لیں گے۔
اوج ظہور نے بتایا کہ ٹرائلز کے پہلے مرحلے میں 5 اور 6 مئی کو ڈویژنل کھلاڑیوں جب کہ دوسرے مرحلے میں 6اور 7 مئی کو ڈیپارٹمنٹل کھلاڑیوں کے ٹرائلز ہوں گے۔ انہوں نے کہا کہ کرنل (ر) شجاعت علی رانا کی سربراہی میں قومی سلیکشن کمیٹی تشکیل دی گئی ہے جب کہ ممبران میں محمد ریاض ملک، ڈی ایس پی ملک اعجاز اور مودود جعفری شامل ہیں ۔
قومی سلیکشن کمیٹی کھلاڑیوں کے 3 روزہ ٹرائلز لینے کے بعد قومی باسکٹ بال ٹیم کے تربیتی کیمپ کے لیے کھلاڑیوں کے ناموں کو شارٹ لسٹ کرے گی۔ اوج ظہور کے مطابق پاکستان باسکٹ بال فیڈریشن نے رواں سال مالدیپ میں منعقد ہونیوالے 4 ملکی ٹورنامنٹ میں شرکت کرنی ہے جس کی تیاریوں کے لیے قومی ٹیم کا بھرپور ٹریننگ اور کوچنگ پلان مرتب کیا ہے جس کا باقاعدہ اعلان پاکستان باسکٹ بال فیڈریشن کے سیکرٹری جنرل خالد بشیر کریں گے۔
