میڈرڈ: معروف برطانوی ٹینس اسٹار اور سابق عالمی نمبر ایک اینڈی مرے کا میڈرڈ اوپن ٹینس ٹورنامنٹ میں سفر تمام ہو گیا۔
ایسوسی ایشن ٹینس پروفیشنل کے زیر اہتمام میڈرڈ اوپن کے دلچسپ مقابلے جاری ہیں، برطانوی ٹینس سٹار کو اٹلی کے اینڈریا واواسوری نے مردوں کے سنگلز مقابلوں کے ابتدائی رانڈ میں شکست دے کر ایونٹ سے باہر کیا۔
مینز سنگلز مقابلوں کے ابتدائی راؤنڈ میچ میں اینڈریا واواسوری نے عمدہ کھیل پیش کرتے ہوئے اینڈی مرے کو اسٹریٹ سیٹس میں ٹائی بریک پر 2-6 اور6-7(7-9)سے شکست دے کر ٹورنامنٹ کے دوسرے رانڈ میں رسائی حاصل کر لی۔
دوسری جانب بیلاروس کی ٹینس اسٹار اور ایونٹ کی سیکنڈ سیڈڈ آرینا سبلینکا اور یونانی ٹینس کھلاڑی ماریا سکاری ویمنز سنگلز کے تیسرے راؤنڈ میں پہنچ گئیں۔ آرینا سبلینکا نے خواتین کے سنگلز مقابلوں کے دوسرے رانڈ میں رومانیہ کی سورانا کرسٹیا اور ماریا سکاری نے نیدرلینڈ ز کی آرانٹکسارس کو شکست دی۔
