اسلام آباد: پی ٹی آئی کے سیکریٹری اطلاعات فواد چودھری نے کہا ہے کہ سپریم کورٹ کے چیف جسٹس اپنا فیصلہ سنائیں ہم دیکھیں گے کون فیصلہ نہیں مانتا۔
سابق وفاقی وزیر اطلاعات کا کہنا تھا کہ پورا پاکستان چیف جسٹس کے پیچھے کھڑا ہے، حکومت کی کوئی حیثیت نہیں، یہ اس وقت کہیں باہر نہیں نکل سکتے، جس پارلیمنٹ میں راجہ ریاض اپوزیشن لیڈر ہو اس پارلیمنٹ کو کون مانے گا؟، یہ پارلیمنٹ عوام کی نمائندگی نہیں کر رہی۔یہ باتیں انہوں نے میڈیا سے گفتگو کرتے ہوئے کہیں۔
فواد چودھری کا کہنا تھا کہ کہ پاکستان کے لوگ نیا الیکشن چاہتے ہیں، ہم تو عام انتخابات کی طرف جانا چاہتے ہیں چلیں خیبرپختونخوا، پنجاب میں ہی کرائیں، ملک کو بنانا ری پبلک بنا دیا گیا ہے، ہمیں اسی طرح ڈٹ کر رہنا ہے جیت ہماری ہو گی، جب سے شہباز شریف وزیر اعظم بنا ایسا لگتا ہے اس ملک کو برائیوں نے گھیر لیا، جس حکومت کے پاس ووٹ کے ذریعے اختیار نہیں وہ حکومت نہیں کر سکتا۔
ان کا مزید کہنا تھا کہ انسانی حقوق کو پامال کیا جا رہا ہے، آج وکلا کو ہی سپریم کورٹ جانے سے روکا جا رہا تھا، آج سارے وکلا نے آئین کے ساتھ اظہار یکجہتی کیا، وکلا کا اظہار یکجہتی کرنا ثابت کرتا ہے آئین کے رکھوالے موجود ہیں، ایسے لوگ پنجاب، خیبرپختونخوا میں وزیر بن گئے جن کو کوئی نہیں جانتا۔
