کراچی:پہلی میکڈونلڈز آل پاکستان جونیئر اینڈ ویمن اسکواش چیمپئن شپ جہانگیر خان سکواش کمپلیکس پی ایس بی کراچی سینٹر میں شروع ہو گئی جس میں ملک بھر سے 136کھلاڑی شرکت کررہے ہیں۔
سندھ اسکواش ایسوسی ایشن کے سیکرٹری محمد عامر خان نے بتایا کہ چیمپئن شپ میں ملک بھر سے 136کھلاڑیوں نے اپنی انٹریز کنفرم کی ہیں جن میں پنجاب کی 38، کے پی کی 24، سندھ کی53، پاکستان آرمی کے پانچ ، پاکستان ائیر فورس کی 10،واپڈا کے چار جبکہ ایس این جی پی ایل اور زیڈ ٹی بی ایل کا ایک، ایک کھلاڑی شامل ہے۔
چیمپئن شپ میں بوائز انڈر17،بوائز انڈر15اور بوائز انڈر 13کے علاوہ گرلز انڈر15اور ویمن کی سینئر کیٹیگری شامل کی گئی ہے،ایونٹ کے کوالیفائنگ اور مین رائونڈز کا آغاز ہو گیا ہے جبکہ 9مارچ کو کوارٹر فائنلز، 10 مارچ کو سیمی فائنلز اور 11 مارچ کو تمام ایونٹس کے فائنل کھیلے جائیں گے۔
چیمپئن شپ کے مرکزی سپانسر میکڈونلڈزہیں جبکہ کو سپانسر میں امریکن بزنس کونسل آف پاکستان شامل ہیں ، چیمپئن شپ کی انعامی رقم 5لاکھ روپے رکھی گئی ہے۔
