کراچی:وزیر اطلاعات سندھ شرجیل انعام میمن نے کہا ہے کہ ڈیڑھ کروڑ سے زائد آبادی والے شہر لاہور سے کل صرف 77 لوگ کوٹ لکھپت جیل پہنچے ہیں، پی ٹی آئی کے دھرنوں اور لانگ مارچ کی طرح جیل بھرو تحریک بھی ناکام ہوگئی ہے۔
صوبائی وزیر سندھ نے کہا کہ عمران خان نے توشہ خانہ گرفتاری سے بچنے کے لیے جیل بھرو تحریک کا شوشہ چھوڑا ہے، نوٹنکی باز عمران خان کو چاہیے کہ تھیٹر کمپنی کھول لیں، سڑکوں اور شاہراہوں کے بجائے تھیٹر ہال میں نوٹنکی لگائے اور اپنی بھٹکتی روح کی تسکین پائے۔
انہوں نے کہا کہ سڑکوں کی بندش سے شہریوں اور بالخصوص مریضوں کو شدید پریشانی کا سامنا کرنا پڑتا ہے، عمران خان کے روز روز کے تماشوں سے میڈیا، انتظامیہ اور قوم کا وقت ضائع ہو رہا ہے۔
شرجیل میمن نے کہا کہ عوام کے اصل مسائل کے بجائے عمران خان سڑکوں پر سرکس لگائے ہوئے ہیں،ملک میں سیلاب اور بارشوں سے تاریخی تباہی ہوئی، لیکن خان جلسے جلوس اور نوٹنکی کرتا رہا۔ پولیس لائن مسجد پشاور سانحہ پیش آیا، عمران خان متاثرہ خاندانوں سے ہمدردی کے بجائے سازشوں کا راگ الاپتے رہے۔
