اسلام آباد: عدالت عالیہ نے زیر سماعت تمام نیب کیسز کے لیے لارجر بینچ بنانے کا حکم دے دیا ہے۔
ذرائع ابلاغ کے مطابق اسلام آباد ہائی کورٹ بار کی جانب سے نیب ترمیمی ایکٹ کو چیلنج کرنے پر مبنی درخواست کی سماعت کرتے ہوئے عدالت عالیہ نے حکم دیا ہے کہ نیب قوانین میں ترامیم کی منظوری کے بعد اسلام آباد ہائی کورٹ میں زیر سماعت تمام نیب کیسز کے لیے لارجر بینچ بنایا جائے۔
چیف جسٹس عامر فاروق اور جسٹس ثمن رفعت امتیاز پر مشتمل اسلام آباد ہائی کورٹ کے ڈویژن بینچ نے نیب قوانین میں ترامیم کی منظوری کے بعد مقدمات کے مستقبل کے حوالے سے دائر درخواست پر سماعت کی، جس میں ایڈیشنل اٹارنی جنرل منور اقبال دوگل، سردار مظفر، ڈپٹی پراسیکیوٹر نیب، محمد رافع اور یاسر راٹھور عدالت کے روبرو پیش ہوئے۔
چیف جسٹس اسلام آباد ہائی کورٹ جسٹس عامر فاروق نے ریمارکس دیے کہ نیب قوانین میں ترامیم کے بعد کے اثرات کو دیکھنا ہے، کون سا کیس کس عدالت میں جائے گا یا ختم ہو گا یہ فیصلہ بھی ہونا ہے۔چیف جسٹس نے کہا کہ نیب کے اس نوعیت کے تمام کیسز کو یکجا کر کے لارجر بینچ بنا کر سن لیتے ہیں۔
بعد ازاں چیف جسٹس اسلام آباد ہائی کورٹ نے رجسٹرار آفس کو تمام کیسز یکجا کر کے لارجر بینچ کے سامنے لگانے کی ہدایت کردی۔
