اسلام آباد: اینٹی نارکوٹکس فورس کی مختلف شہروں میں کارروائیوں کے دوران بھاری مقدار میں منشیات برآمد کرکے ملزمان کو گرفتار کرلیا گیا۔
ترجمان اے این ایف کے مطابق انسداد منشیات کی کارروائیاں کے دوران پشاور سے لاہور بھاری مقدار میں منشیات اسمگل کرنے کی کوششیں ناکام بنا دی گئی ہیں۔ اس سلسلے میں اے این ایف نے کارروائی کرتے ہوئے کالا شاہ کاکو انٹرچینج کے قریب کار سے 49 کلو سے زائد چرس اور 31 کلو سے زائد افیون برآمد کرکے پشاور کے رہائشی ملزم کو گرفتار کرلیا۔
علاوہ ازیں صوابی ٹول پلازہ کے قریب ٹرک سے 50 کلو 400 گرام چرس اور 15 کلو 600 گرام افیون برآمد کرکے چترال اور اپر دیر کے رہائشی 2 ملزمان کو گرفتار کرلیا گیا۔
اینٹی نارکوٹکس کا مختلف شہروں میں تعلیمی اداروں میں طلبہ کو منشیات سپلائی کرنے والوں کے خلاف بھی آپریشن جاری ہے۔ اس سلسلے میں پشاور کے علاقے حیات آباد رنگ روڈ کے قریب مختلف اسکولوں میں منشیات سپلائی کرنے والے خیبر کے رہائشی 2 ملزمان گرفتار کرلیے گئے، جن کے قبضے سے 4 کلو 890 گرام چرس برآمد ہوئی ہے۔
راوی ٹول پلازہ کے قریب کار سے 19 کلو سے زائد چرس اور1 کلو 800 گرام افیون برآمد کرکے چارسدہ اور نوشہرہ کے رہائشی 2 ملزمان کو گرفتار کرلیا گیا ہے۔ تمام کارروائیوں میں ملزمان کو گرفتار کرکے انسداد منشیات ایکٹ کے تحت مقدمہ درج کرلیا گیا ہے۔ اے این ایف نے تحقیقات بھی شروع کردی ہے۔
