اسلام آباد: پاکستان پیپلز پارٹی کے چیئرمین اور وزیر خارجہ بلاول بھٹو زرداری نے کہا ہے کہ قائد عوام شہید ذوالفقار علی بھٹو عوام کی طاقت کی علامت تھے، ان کا نظریہ، جدوجہد اور قربانی لازوال ہیں، ذوالفقار علی بھٹو کے مشن کی روشنی میں ملک کو رول ماڈل بنانے کی جدوجہد کو منزل پر پہنچا کر ہی دم لیں گے۔
قائدعوام شہید ذوالفقار علی بھٹو کے 95 ویں یوم ولادت پر اپنے پیغام میں بلاول بھٹو زرداری نے کہا کہ بھٹو ایک نظریہ ہے، جسے مٹانے کی کوشش کرنے والے تاریخ میں بے نام و نشان خاک بن گئے جبکہ بھٹو کا نام آج بھی پاکستان کے گلی کوچوں سمیت دنیا کے کونے کونے میں گونجتا ہے۔
چیئرمین بلاول بھٹو زرداری نے کہا کہ قائد عوام قوم کے مقبول لیڈر تھے، جنہوں نے اپنے خلوص، تدبر اور محنت کے ذریعے ملک کو سیاسی، معاشی اور معاشرتی لحاظ سے آگے بڑھایا، شہید بھٹو نے عوام کو سیاسی شعور دیا اور بااختیار بنایا، ملک کو پہلا متفقہ آئین اور جوہری پروگرام دیا، پاکستان کو اسلامی دنیا کا مرکز بنایا اور پاک چین تعلقات کی بنیاد رکھی۔
پی پی چیئرمین نے کہا کہ پاک چین تعلقات کو ایک اٹوٹ دوستی میں تبدیل کرنا بھی چیئرمین ذوالفقار علی بھٹو کا طرہ امتیازہے۔قائد عوام نے بطور ملک کے پہلے منتخب وزیراعظم پاکستان میں مزدوروں کو ٹریڈ یونینز تشکیل دینے کا حق دیا اور مزدور دشمن پالیسیوں کا خاتمہ کیا۔زرعی اصلاحات کرکے بے زمین کسانوں کو زمینیں دیں اور غریبوں کو گھروں کا مالک بنایا۔
انہوں نے کہا کہ قائد عوام کے نظریے کو فروغ اور ان کے مشن کو پایہ تکمیل تک پہنچانے کے لیے شہید محترمہ بینظیر بھٹو نے زندگی بھر جدوجہد کی اور اپنی جان تک کی پرواہ نہیں کی۔
بلاول بھٹو زرداری نے اس عزم کا اعادہ کیا کہ وہ اپنی جماعت کے بانی چیئرمین شہید ذوالفقار علی بھٹو کے نظریئے اور مشن کی روشنی میں 1973 کے آئین کی حفاظت، جمہوریت کو مضبوط، رواداری اور مساوات کو فروغ اور پاکستان کو اسلامی دنیا کا رول ماڈل ترقی یافتہ ملک بنانے کی جدوجہد کو منزل پر پہنچا کر ہی دم لیں گے۔
