کراچی: پیپلز پارٹی کے رہنما منظور وسان نے پیش گوئی کی ہے کہ وہ نواز شریف کی واپسی اور عمران خان کو جیل میں دیکھ رہے ہیں۔
نجی ٹی وی کی رپورٹ کے مطابق اپنی سیاسی پیش گوئیوں سےشہرت رکھنے والے پیپلز پارٹی کے سینئر رہنما اور صوبائی مشیر زراعت منظور وسان نے ایک اور پیش گوئی کرتے ہوئے کہا ہے کہ مسلم لیگ ن کے قائد نواز شریف رواں برس وطن واپس آئیں گے جب کہ عمران خان کو جیل میں دیکھ رہا ہوں۔
انہوں نے اپنے ایک ویڈیو بیان میں پیش گوئی کرتے ہوئے مزید کہا کہ 2023 میں عمران خان کا مستقبل کچھ بھی نہیں، وہ مصیبتوں کے حصار میں رہیں گے۔ میں انہیں کسی دیوار کے پیچھے قید دیکھ رہا ہوں۔ انہوں نے کہا کہ وہ چیئرمین پی ٹی آئی کو سندھ یا بلوچستان کی کسی جیل میں دیکھ رہے ہیں۔
پیپلز پارٹی سے متعلق پیش گوئی کرتے ہوئے منظور وسان کا کہنا تھا کہ نیا برس 2023 پیپلز پارٹی کے لیے بہتر ہے۔ وہ پارٹی کو سندھ کے علاوہ دیگر صوبوں میں مضبوط ہوتا دیکھ رہے ہیں۔
منظور وسان نے کہا کہ سابق وزیراعظم عمران خان کچھ اداروں نے بنایا تھا، لیکن وہ اب ان کے ساتھ نہیں ہیں۔ انہوں نے کہا کہ جو لوگ عمران خان کے ساتھی ہیں، وہ بہت جلد ان سے الگ ہو جائیں گے یا تو وہ اپنی دوسری پارٹی بنائیں گے یا پھر پرانی پارٹیوں میں واپس شمولیت اختیار کرلیں گے۔
انہوں نے کہا کہ باجوہ صاحب نے جب عمران خان کا ساتھ دیا تھا، تب وہ خاموش کیوں تھے؟۔ ایم کیو ایم سے متعلق پیش گوئی کرتے ہوئے منظور وسان نے کہا کہ وہ آنکھیں نہیں دکھائے گی کیونکہ ایم کیو ایم اور ہم متحد رہیں گے۔ انہوں نے کہا کہ ہر سیاسی جماعت کا حق ہے کہ وہ اپنے مطالبات سامنے رکھے۔
