فیصل آباد: پیپلز پارٹی کے مرکزی سینئر رہنما اورسابق وفاقی وزیرداخلہ چوہدری اعتزاز احسن نے کہا ہے کہ عمران خان نے سیاسی بصیرت کی بجائے غیر ضروری بڑ ھکیں مار کر اپنا اور پی ٹی آئی کے ورکرز کا وقت اور سرمایہ برباد کیا۔
چوہدری اعتزاز احسن کا کہنا تھاکہ ن لیگ پیپلز پارٹی کیساتھ کبھی بھی دل سے مخلص نہ تھی نہ ہو سکتی ہے۔احسان فراموش کبھی بھی احسان مند نہیں بن سکتا۔یہ قانون فطرت ہے۔پیپلز پارٹی جن کے ساتھ مصلحت کے تحت چل رہی ہے وہ ہمارے ساتھ مخلص نہیں ہیں۔اگر ہم پنجاب میں ایسے ہی چلتے رہے تو یہ ہمارے سگے نہیں ہیں وہ پنجاب میں ہمیں ختم کردیں گے۔ ان کے ساتھ جڑے رہے تو پہلے 6نشستیں نکلی تھیں اب کی بار وہ بھی نہیں نکلیں گی۔ان خیالات کا اظہار انھوں نے پیپلز پارٹی کے کارکنوں لال حسین راشد، میاں ارشد ندیم، محمد یونس ہمدم اوردیگر ملاقات کرتے ہوئے کیا۔
ان کہنا تھا کہ پنجاب میں ہم پھر سی یا ڈی کلاس کی ٹیم ہوں گے اور مقابلہ پھر نواز شریف اور عمران خان کے درمیان ہوگا۔ جو سوچ بینظیر بھٹو کی تھی وہی سوچ نیلسن منڈیلا کی تھی۔ نواز شریف نے بی بی کے خلاف پنجاب میں تقاریر کی تھیں۔ پیپلز پارٹی نے اس کے باوجود میثاق جمہوریت پر اتفاق کیا ۔ نواز شریف نے آصف زرداری کے خلا ف کیس بنائے ۔اس ملک کے لئے جمہوری ہی بہترین حل ہے ۔
