لاہور: پنجاب پولیس نے جعلی کرنسی بنانے والے 4 رکنی گروہ کو گرفتار کرلیا، جن کے قبضے سے نوٹ اور مشینری برآمد کرلی گئی۔
نجی ٹی وی کے مطابق لاہور میں غالب مارکیٹ پولیس نے کارروائی کرتے ہوئے جعلی کرنسی بنانے والا گینگ گرفتار کرلیا۔ حراست میں لیے جانے والے ملزمان کی شناخت شیرباز، اشفاق، شمس الرحمن اور تنویر کے ناموں سے ہوئی۔
پولیس حکام کے مطابق ملزمان سے کروڑوں روپے کے جعلی کرنسی نوٹ اور جعلی نوٹ بنانے والی مشینری برآمد ہوئی۔ دوران تفتیش ملزمان نے بتایا کہ وہ کافی عرصے سے یہ کام کررہے ہیں اور جعلی کرنسی تیار کر کے اسے دوسرے شہروں میں بھیجتے تھے۔
پولیس نے ملزمان کے خلاف مقدمہ درج مزید تفتیش کا آغاز بھی کردیا جبکہ ایس پی ماڈل ٹاؤن حسن جاوید بھٹی نے کہا کہ ایسے جرائم پیشہ عناصر کسی رعایت کے مستحق نہیں ہیں۔
