پی ٹی آئی دور میں کرپشن انڈیکس ایسے بڑھا جیسے خلا میں راکٹ جاتا ہے، احسن اقبال

اسلام آباد:  وفاقی وزیر منصوبہ بندی احسن اقبال نے کہا ہے کہ پی ٹی آئی دور میں کرپشن انڈیکس ایسے تیزی سے بڑھا جیسے خلا میں راکٹ جاتا ہے۔

اسلام آباد میں گورننس انوویشن لیب کے افتتاح پر خطاب کرتے ہوئے احسن اقبال کا کہنا تھا کہ یہ سہولت 2018میں تیار کی تھی لیکن حکومت کی تبدیلی سے منصوبہ رہ گیا، جس حکومت نے سب سے زیادہ شفافیت قائم کی اسے چور ڈاکو کہا گیا۔

ان کا کہنا تھا کہ ڈیلی میل نے وزیراعظم کی کردار کشی کی، اب انہوں نے معافی مانگی ہے، ڈیلی میل کو سہولت پچھلی حکومت نے فراہم کی تھی، ہم اپنی مینجمنٹ کو درست کرلیں تو دوسرے ملکوں کو پیچھے چھوڑ سکتے ہیں، شفافیت کو نافذ کرنے میں زیادہ مستقل مزاجی سے کام کا اعادہ کرنا چاہیے

احسن اقبال کا مزید کہنا تھا کہ آج ہم شدید مالی بحران کا شکار ہیں، بین الاقوامی سرمایہ کار بھی پاکستان سے دور ہوگئے ہیں، نیب نے سرکاری افسروں کو وعدہ معاف گواہ بننے پر زور دیا، اس فضا میں کوئی ملک ترقی نہیں کرسکتا، پبلک سیکٹر میں شفافیت لانا ضروری ہے، اپنی وزارت کی ویب سائٹ پر ہاٹ لائن قائم کر رہے ہیں۔