لاہور میں ٹریفک وارڈن عمران فراز نے نجی یونیورسٹی سے ایل ایل ایم کی ڈگری حاصل کر لی۔ سی ٹی او لاہور ڈاکٹر اسد ملہی نے ٹریفک وارڈن عمران فراز کو مبارکباد دی اور وارڈنز کو تعلیمی میدان میں مکمل سپورٹ کا اعلان کیا۔
ڈاکٹر اسد ملہی کا کہنا تھا کہ وارڈنز کا ڈیوٹی کے ساتھ ساتھ تعلیم سرگرمیاں جاری رکھنا خوش آئند ہے، 2400 وارڈنز میں سے 140 وارڈنز ایم فل ڈگری جبکہ 02 وارڈنز ڈاکٹریٹ ڈگری ہولڈرز ہیں جبکہ 80 فیصد وارڈنز نے مخلتف مضامین میں ماسٹرز کیے ہوئے ہیں۔
انہوں نے کہا کہ سٹی ٹریفک پولیس کو تعلیمی قابلیت میں سب فورسز پر سبقت ہے، ٹریفک وارڈنز فرانزک سائنس، مالیکیولر بیالوجی اور انگلش لڑیچر کی ڈگری رکھتے ہیں جبکہ قانون، اکنامکس، میتھیمٹکس، کریمنالوجی اور انٹرنیشنل ریلیشنز میں بھی ایم فل کیے ہوئے ہیں۔
سی ٹی او لاہور نے کہا کہ ایم فل کی ڈگری رکھنے والے وارڈنز کو ہر ماہ پانچ ہزار روپے الاونس دیا جا رہا ہے جبکہ پی ایچ ڈی کی ڈگری رکھنے والے کو 10ہزار روپے الاونس دیا جا رہا ہے، ٹریفک وارڈنز کی ویلفیئر کو ہرممکن یقینی بنایا جا رہا ہے۔
