میلبرن: پاکستان اور بھارت کے مابین اتوار کو طے اہم میچ میں شان مسعود کی دستیابی کی خوش خبری سامنے آ گئی۔ قبل ازیں پاکستانی ٹیم کے اوپنر زخمی ہوگئے تھے، جنہیں طبی امداد کیلیے اسپتال منتقل کیا گیا تھا، اور بعد ازاں ان کی رپورٹس کلیئر آ گئیں۔
ترجمان ٹیم کے مطابق میلبرن میں پریکٹس سیشن کے دوران اوپنر شان مسعود کے سر پر گیند لگی تھی جس کے باعث وہ زخمی ہوئے تاہم ان کے تمام ٹیسٹ کلئیر آئے ہیں، گیند لگنے کی وجہ سے اوپنر کو معمولی سوجن ہے۔ اوپنر شان مسعود کی تمام نیورولوجیکل آبزرویشن رپورٹس نارمل ہیں تاہم پھر بھی ان کی صحت کا کل دوبارہ جائزہ لیا جائے گا۔
ماہرین کا کہنا ہے کہ ٹی 20 ورلڈ کپ میں بھارت کے خلاف شان مسعود دستیاب ہونے کے باوجود کھیل سکیں گے یا نہیں، اس کا فیصلہ میچ کے روز ہی سامنے آنے کا امکان ہے۔
