اسلام آباد: پاکستان مسلم لیگ ن کے قائد میاں نواز شریف نے پنجاب میں ہونے والے ضمنی انتخابات میں شکست پر پارٹی رہنماؤں کی جانب سے پیش کی جانے والی تاویلیں یکسر مسترد کردیں۔
میڈیا رپورٹس کے مطابق انتخابی شکست پر سابق وزیراعظم نوازشریف نے حکومتی اور پارٹی عہدے الگ الگ کرنے کا عندیہ دے دیا ہے۔ نواز شریف کی وطن واپسی تک پاکستان میں ن لیگ کا عبوری سیٹ اپ بنانے پر بھی غور و خوص شروع کردیا گیا ہے جس کے تحت عبوری سیٹ اپ کے سربراہ کو پارٹی معاملات اور دیگر اہم امور پر فیصلہ سازی کا مکمل اختیار ہو گا۔
تشکیل دیے جانے والے عبوری سیٹ اپ میں مسلم لیگ ن کی مرکزی نائب صدر مریم نواز کو کلیدی کردار دیا جائے گا۔پارٹی کا عبوری سیٹ اپ نواز شریف کی وطن واپسی تک مکمل طور پر فعال و متحرک کردار ادا کرے گا۔
ذرائع نے بتایا ہے کہ عبوری سیٹ اپ میں متحرک، فعال اور سخت موقف رکھنے والے رہنماؤں کو شامل کیا جائے گا۔پارٹی قائد میاں نواز شریف آئندہ چند روز میں اس سلسلے میں پارٹی رہنماؤں سے مشاورت مکمل کرنے کے بعد اعلان کریں گے۔
