کراچی:انگلش کرکٹ ٹیم 17 سال بعد پاکستان کے ساتھ سیریز کھیلنے کراچی پہنچ گئی۔
ذرائع سول ایوی ایشن کے مطابق انگلش کرکٹ ٹیم دبئی سے امارات ایئر لائن کی پرواز ای کے 600 سے کراچی پہنچی ہے۔ پاکستان کرکٹ بورڈ کے اعلیٰ حکام نے انگلش ٹیم کا کراچی ائیر پورٹ پر استقبال کیا۔
پولیس حکام کے مطابق مہمان ٹیم کے لیے کراچی ائیرپورٹ اور ہوٹل کے روٹ پر سخت حفاظتی انتظامات کیے گئے ہیں، انگلینڈ کرکٹ ٹیم کو خصوصی حفاظتی انتظامات اور پروٹوکول میں ہوٹل لایا جا رہا ہے۔
پاک انگلینڈ ٹی20 سیریز کا آغاز20 ستمبر کو کراچی سے ہوگا۔ اس سلسلے میں نیشنل اسٹیڈیم میں تیاریاں مکمل ہیں۔ دونوں ٹیمیں16ستمبر سے پریکٹس کا آغازکریں گی۔
7 ٹی 20 انٹرنیشنل میچز پر مشتمل سیریز 20 ستمبر سے 2 اکتوبر تک کھیلی جائے گی۔
ابتدائی 4 میچز20 ،22، 23 اور 25 ستمبر کو نیشنل اسٹیڈیم کراچی میں کھیلے جائیں گے جب کہ باقی 3 میچز 28 ، 30 ستمبر اور 2 اکتوبر کو قذافی اسٹیڈیم لاہور میں کھیلے جائیں گے۔
تمام میچز پاکستانی وقت کے مطابق شام 7:30 بجے شروع ہوں گے۔
