عوامی مسلم لیگ کے سربراہ شیخ رشید نے کہا ہے کہ سیاسی عدم استحکام معاشی قیامت کو جنم دے رہا ہے، ڈالر مہنگا ہونے کے باوجود آئی ایم ایف کے ساتھ معاہدہ نہیں ہو سکا۔
اسلام آباد میں میڈیا سے گفتگو کرتے ہوئے شیخ رشید نے کہا کہ پی ٹی آئی نے پرویزالٰہی کو وزیراعلیٰ پنجاب کے لیے نامزد کیا ہے ،کل نہیں تو پرسوں پرویز الٰہی وزیر اعلیٰ پنجاب کا حلف اٹھائیں گے، چوہدری شجاعت پرویزالٰہی کے ساتھ کھڑے ہوں گے۔
سابق وزیر داخلہ کا کہنا تھا کہ آج سپریم کورٹ میں بیرون ملک پاکستانیوں کے ووٹ کے حق میں درخواست دائر کی ہے، بیرون ملک پاکستانیوں کو ووٹ کے حق سے کوئی نہیں روک سکتا، ان کا ملک پر اتنا ہی حق ہے جتنا کسی اور کا، نیب قوانین میں ترمیم کے خلاف بھی آنا چاہتے تھے لیکن عمران خان نے اس کی اپیل دائر کردی ہے۔
اپنے ٹویٹ میں شیخ رشید نے مخدوش ملکی معاشی صورتحال کی جانب اشارہ کرتے ہوئے کہا کہ 226 کے ڈالر کے ہونے کے باوجود آئی ایم ایف کے ساتھ ابھی بھی بیل آؤٹ معاہدہ طے نہیں پایا۔ اکتوبر نومبر میں عام انتخابات کے علاوہ کوئی حل نہیں۔ پھر کوئی بھی حکومت نہیں کر پائے گا۔
سیاسی عدم استحکام معاشی قیامت کو جنم دے رہا ہے۔ 226کے ڈالر کے ہونے کے باوجود،IMF کے ساتھ ابھی بھی بیل آؤٹ معاہدہ طے نہیں پایا۔اکتوبر نومبر میں عام انتخابات کے علاوہ کوئی حل نہیں۔پھر کوئی بھی حکومت نہیں کر پائے گا۔اوورسیز ووٹوں کے لیے ابھی سپریم کورٹ جارہا ہوں،شام کو لاہور جاؤں گا
— Sheikh Rashid Ahmed (@ShkhRasheed) July 20, 2022
انہوں نے کہا کہ تحریک انصاف عمران خان کا نام ہے۔ تحریک انصاف میں باقی کوئی میٹر نہیں کرتا، جہاں عمران خان ہوگا ہم اس کے ساتھ ہوں گے۔ پرویز الٰہی تحریک انصاف کے نامزامیدوارہیں۔ جہاں ووٹوں کی خریدو فروخت ہو، سمجھیں آصف زرداری پیچھے ہے۔ آصف زرداری خریدوفروخت کی منڈی لگاتا ہے ۔ جہاں ووٹ خریدا اورفروخت ہو رہا ہوسمجھ جائیں آصف زرداری موجود ہے۔ انہوں نے کہا کہ لاہور جا رہا ہوں، وہاں چودھری شجاعت حسین سے بات کروں گا۔ ق لیگ کے پرانے تعلقات ہیں ۔
