کراچی: امیر جماعت اسلامی پاکستان سراج الحق نے کہا ہے کہ کراچی ترقی کرے گا تو پورا پاکستان بھی ترقی کرے گا، کراچی تباہ ہورہا ہے اس کا مرہم صرف اور صرف جماعت اسلامی ہے۔
بنارس پر بلدیاتی انتخابات کے جلسے سے خطاب کرتے ہوئے سراج الحق نے کہاکہ شدید بارش میں بھی کراچی کے عوام پر عزم ہیں، کراچی کے عوام کراچی میں تعمیر و ترقی چاہتے ہیں۔
امیر جماعت اسلامی پاکستان کا کہنا تھا کہ کراچی کی ترقی کے لیے ترازو کو کامیاب کروانا ضروری ہے، کراچی ترقی کرے گا تو پورا پاکستان بھی ترقی کرے گا۔ ان کا یہ بھی کہنا تھا کہ ملک میں تمام حکمران جماعتوں نے 75 سال حکومت کی، پاکستان میں انہی شہروں نے ترقی کی جہاں جماعت اسلامی کو موقع ملا۔
انہوں نے کہا کہ کراچی کے نوجوان بے روزگار ہیں، تعلیم، صحت کی بنیادی سہولیات سے محروم ہیں، ہم حیران ہیں کہ آج پی ڈی ایم اور پی ٹی آئی دونوں جلسے کررہے ہیں۔
سراج الحق نے یہ بھی کہا کہ آج تمام جماعتیں حکومت میں موجود ہیں وہ جلسہ کرنے کی بجائے تعمیر و ترقی کے خام کریں، حکمران جماعتیں ناکام ہوچکی ہیں ، ان کے پاس کوئی ویژن نہیں ہے۔
ان کا کہنا تھا کہ کراچی نے مشرق مغرب جنوب اور شمال میں ترقی کی علامت صرف اور صرف نعمت اللہ خان اور عبد الستار افغانی کا نام ہے۔ امیر جماعت اسلامی سراج الحق کا مزید کہنا تھا کہ ترازو عدل و انصاف کا نشان ہے، جماعت اسلامی کا مئیر آئے گا تو عدل و انصاف کے ساتھ فیصلہ کرے گا۔
