نائیجیریا میں اغواء ہونے والا پاکستانی شہری رہا کردیا گیا، جس پر وزیر خارجہ بلاول بھٹو زرداری نے نائیجیریا کی قیادت، حکومت اور شہریوں سے اظہار تشکر کیا ہے۔
بلاول بھٹو زرداری نے ایک ٹوئٹ میں پاکستانی شہری ابوذر محمد افضل کی رہائی کی تصدیق کی اور کہا کہ میں نائیجیریا کی قیادت، حکومت اور وہاں کے عوام کا مدد کرنے پر شکریہ ادا کرتا ہوں۔ انہوں نے پاکستانی شہری کی رہائی کو یقینی بنانے کے لیے کاوشیں کرنے والے تمام لوگوں سے اظہار تشکر کیا۔
خبر رساں اداروں کے مطابق نائیجیریا میں رواں برس مارچ میں 62 افراد اغوا ہوئے تھے، جن میں پاکستانی شہری ابوذر محمد افضل بھی شامل تھا۔ بعد ازاں مئی میں مغوی کے اہل خانہ کی جانب سے جاری ویڈیو میں دیکھا جا سکتا ہے کہ ابوذر محمد افضل اغوا ہونے والے دوسرے لوگوں کے ساتھ موجود ہے جب کہ مسلح افراد چہرہ چھپائے کھڑے ہیں۔
مغوی کے والد نے ذرائع ابلاغ سے بات کرتے ہوئے کہا تھا کہ ابوذرمحمد افضل مائیکروبایولوجی میں پی ایچ ڈی کی ڈگری کا حامل ہے اور نائیجیریا میں غیر ملکی کمپنی میں بطور جی ایم ملازمت کرتا تھا۔
