پہلی سیاسی کامیابی حاصل کرلی، اب آگے بڑھنا ہے، آصف زرداری

نواب شاہ (صباح نیوز) سابق صدر پاکستان آصف زرداری نے کہا ہے کہ سیاسی طور پر پہلی کامیابی حاصل کرلی، اب آگے کی طرف بڑھنا ہے۔ انہوں نے یہ بات زرداری قبیلے کے معززین سے ملاقات کے دوران کہی جنہوں نے سابق صدر سے ملاقات کی اور انہیں عیدالفطر کی مبارکباد دی۔ سابق صدر نے ملاقات کرنے والے معززین کے وفد کو عیدالفطر کی مبارکباد دیتے ہوئے کہا کہ زرداری قبیلے نے ہمیشہ مجھ پر اعتماد کیا۔ انہوں نے کہا کہ پہلے بھی آپ کیلیے کام کیے ہیں، آئندہ بھی آپ کے مسائل کے حل کو ترجیح دوں گا۔ سابق صدر نے کہا کہ درس گاہوں کے قیام اور اسپتالوں کی تعمیر سے متعلق نواب شاہ میں ریکارڈ ترقیاتی کام ہوئے ہیں۔