قومی کرکٹ ٹیم اگست میں نیدر لینڈ کا دورہ کرے گی ، شیڈول جاری

کراچی (اسٹاف رپورٹر) پاکستان اور نیدرلینڈز کے مابین دو طرفہ ون ڈے انٹرنیشنل کرکٹ سیریز اگست میں روٹرڈم میں کھیلی جائے گی۔ سیریز میں شامل تین ون ڈے انٹرنیشنل میچز 16، 18 اور 21 اگست کو کھیلے جائیں گے۔اس سے قبل یہ سیریز جولائی 2020 میں کھیلی جانی تھی۔ تینوں میچز آئی سی سی مینز کرکٹ ورلڈ کپ سپر لیگ کا حصہ ہیں۔ دونوں ٹیمیں اس طرز کی کرکٹ میں آخری مرتبہ آئی سی سی مینز کرکٹ ورلڈ کپ 2003 میں مدمقابل آئی تھیں۔ آئی سی سی مینز ورلڈ کپ سپر لیگ میں پاکستان نے اپنے 12 میں سے 6 میچز جیت رکھے ہیں جبکہ نیدرلینڈز کی ٹیم 10 میں سے صرف 2 میچز ہی جیت سکی ہے۔ذاکر خان، ڈائریکٹر انٹرنیشنل پی سی بی: ڈائریکٹر انٹرنیشنل پی سی بی ذاکر خان نے کہا انہیں خوشی ہے کہ میزبان بورڈ کے تعاون سے وہ اس سیریز کو ری شیڈول کرنے میں کامیاب رہے ہیں۔ یہ سیریز نیدرلینڈز میں کرکٹ کے فروغ اور ترقی کے لئے بہت اہم ہے۔انہوں نے کہا کہ قومی کرکٹ ٹیم کا سیزن 22-2021 شاندار رہا ہے، وہ پر اعتماد ہیں کہ قومی کھلاڑی بہترین کارکردگی کا تسلسل برقرار رکھتے ہوئے نیدرلینڈز کے فینز کو بہترین تفریح فراہم کریں گے۔شیڈول کے مطابق16 اگست: پہلا ون ڈے انٹرنیشنل میچ؛ وی او سی کرکٹ گرانڈ روٹرڈم 18 اگست: دوسرا ون ڈے انٹرنیشنل میچ؛ وی او سی کرکٹ گرانڈ روٹرڈم 21 اگست: تیسرا ون ڈے انٹرنیشنل میچ؛ وی او سی کرکٹ گرانڈ روٹرڈم کھیلا جائے گا۔