کراچی ( اسٹاف رپورٹر)اینگرو کارپوریشن لمیٹڈ پاکستان کرکٹ بورڈ کے پاتھ وے کرکٹ کا آفیشل پارٹنر بن گیا ہے۔ اس سلسلے میں دونوں فریقین نے ایم او یو پر دستخط کردیے ہیں۔ معاہدے کے تحت اینگرو کارپوریشن لمیٹڈ پی سی بی کے پاتھ وے کرکٹ پروگرام کا حصہ بننے والے کوچز کے تمام اخراجات برداشت کرے گا۔ ابتدائی طور پر یہ معاہدہ تین سال کے لیے کیا گیا ہے، تاہم اس میں بعدازاں باہمی رضامندی کی بنیاد پر توسیع بھی کی جاسکتی ہے۔اینگرو کرکٹ کوچنگ پروجیکٹ کے ہائی پرفارمنس کوچز نیشنل ہائی پرفارمنس سینٹر لاہور میں موجود باصلاحیت کھلاڑیوں کی کوچنگ کریں گے۔ عالمی شہرت یافتہ یہ کوچز ان کھلاڑیوں کو فاسٹ بولنگ، اسپن بولنگ، فیلڈنگ/وکٹ کیپنگ، بیٹنگ اور پاور ہٹنگ کی خصوصی تربیت فراہم کریں گے۔چیئرمین پاکستان کرکٹ بورڈ رمیز راجہ کا کہنا ہے کہ پاتھ وے کرکٹ میں سرمایہ کاری کرنا ان کا ایک بڑا ہدف تھا، وہ یہ عہدہ سنبھالتے ہی نوجوان کھلاڑیوں کو ملک بھر میں معیاری پریکٹس کی سہولیات فراہم کرنے کے لیے کوشاں رہے ہیں۔ انہوں نے کہا کہ پی سی بی اور اینگرو کارپوریشن لمیٹڈ کے درمیان یہ معاہدہ پاکستان میں پاتھ وے کرکٹ میں انقلاب لا سکتا ہے۔ غیاث خان کا کہنا ہے کہ اینگرو پختہ یقین رکھتا ہے کہ پاکستان کے نوجوان عظیم صلاحیتوں سے مالال مال ہیں، اس ٹیلنٹ کو ترقی کے مواقع فراہم کرنے کی اشد ضرورت ہے۔
